Brandbestryders het nie net personeel van die korrektiewe fasiliteit uit ‘n brand gered nie, hulle het ook KPR op ‘n bewustelose kat uitgevoer.
’n Kat en vier mense is gered uit ’n brand wat gister in een van die woonkwartiere by Kgosi Mampuru II-korrektiewe fasiliteit in Pretoria uitgebreek het.
Volgens Charles Mabaso, woordvoerder van Tshwane-nooddienste, is hulle om 15:14 van die brand in kennis gestel.
Hy sê toe brandbestryders by die toneel aankom, was vier eenhede van ‘n 150 m lange struktuur – wat sowat 10 eenhede huisves – in vlamme gehul.
Die span het dadelik met brandbestryding operasies begin.
Vier vroue is deur paramedici vir rookinaseming behandel en in ‘n stabiele toestand na Mediclinic Muelmed-hospitaal en Mediclinic Medforum-hospitaal vervoer.
“Terwyl die soektogte in een van die eenhede vol digte rook uitgevoer is, het ‘n brandbestryder ‘n lewelose kat ontdek. Hy het dit dadelik uit die eenheid gebring terwyl hy KPR uitgevoer het,” sê Mabaso.
Die kat het sy bewussyn herwin, en paramedici het suurstof terapie toegedien, voeg hy by.
Die brand het twee eenhede vernietig, terwyl nog vier groot rook- en dak skade gehad het.
“Daar word vermoed dat die brand in een van die eenhede begin het en vinnig na ander eenhede versprei het weens die afwesigheid van brand mure tussen hulle.”
Mabaso sê 26 huurders is deur die brand geraak.
“Die bestuur van die korrektiewe fasiliteit het aangedui dat alternatiewe verblyf vir hulle gereël sal word.”
Die oorsaak van die brand is nog nie bekend nie.
