Die feesseisoen is om die draai. Saam met dit kom ook die ernstige waarskuwing teen misdaad waar Suid-Afrikaanse winkelsentrums en hul kopers maklike teikens is vir misdadigers.
Die styging in rooftogte, winkeldiefstal en agtervolgings en die gepaardgaande aanvalle is bronne van kommer onder wetstoepassers en sekuriteitskenners. Dit is noodsaaklik dat Suid-Afrikaners ten alle tye waaksaam sal wees tydens hul inkopietogte.
Data van die Suid-Afrikaanse Polisiediens (SAPD) toon ‘n kommerwekkende styging in sekere misdaadkategorieë. In die jongste misdaadstatistieke het rooftogte en diefstalle by kommersiële persele met 2,7% toegeneem vergeleke met verlede jaar, met kapings en motordiefstalle wat ook ‘n merkbare toename gesien het.
Hierdie tendense is die duidelikste in provinsies met groter winkelsentrums, soos Sentraal Transvaal, die Wes-Kaap en Natal – Sentraal Transvaal loop voor wat sake misdaadsake aanbetref.
Hierdie toename strook met Fidelity Services Group se waarskuwing oor die gesofistikeerdheid van kriminele bedrywighede tydens spitswinkeltye, dikwels aangevuur deur binne-inligting wat misdadigers help om goed gekoördineerde rooftogte by winkelsentrums, kleinhandelwinkels en selfs vulstasies uit te voer.
Charnel Hattingh, Groephoof van Bemarking en Kommunikasie vir Fidelity Services Group, raai kopers aan om voorbereid en bewus te wees van hul omgewing. Hattingh beklemtoon dat kalmte die sleutel is in die geval van ‘n roof, en benadruk dit dat verhoogde emosionele reaksies situasies kan eskaleer.
Kopers word versoek om met rowers saam te werk as hulle hul in sulke situasies bevind, skielike bewegings te vermy en om nie selfone te gebruik nie om te verhoed dat aanvallers agressief kan word.
Om laag op die grond te bly en na ‘n beskutte plek te beweeg, kan ook help om blootstelling aan potensiële skade te verminder.
Benewens persoonlike veiligheid, word kopers aangeraai om hulself minder aantreklike teikens te maak deur die sigbare waarde van hul besittings te verminder. Dit sluit in om slegs noodsaaklike items saam te dra, waardevolle items soos selfone en juweliersware buite sig te hou, en om groot bedrae kontant te vermy.
Baie winkelsentrums volg nou protokolle wat winkelpersoneel toelaat om luike toe te maak en kliënte na veilige gebiede te skuif wanneer ‘n bedreiging ontstaan.
Hattingh merk op dat hoewel rowers dikwels na kontant en hoëwaarde-items mik, is daar altyd ‘n risiko dat ‘n voorval gewelddadig kan word, en kopers moet dus kalm en paraat bly.
Soos uitgewys deur Fidelity ADT, is ‘n besonder kommerwekkende neiging die toename in volg-huisaanvalle gedurende spitswinkelseisoene.
Misdadigers moniteer gereeld winkelsentrumbewoners wat aansienlike aankope gedoen het en volg hulle dan huis toe om hul teikens te beroof. Heel dikwels is voertuie wat gelaai is met nuut verkrygde goedere ‘n gewilde teiken.
Om hierdie voorvalle te vermy, beveel Hattingh aan dat kopers vermy om aandag te trek deur die aantal sigbare aankope in hul voertuie te beperk en enige verdagte aktiwiteit stiptelik aan te meld indien hulle vermoed dat hulle gevolg word.
Wetstoepassing en sekuriteitsfirmas verskerp pogings om die risiko’s verbonde aan vakansie-inkopies te bestuur. Individue speel egter steeds ‘n deurslaggewende rol in hul eie veiligheid. Kopers word aangemoedig om besoeke gedurende daglig te beplan, afgesonderde winkelsentrumparkeerplekke te vermy en in goed beligte gebiede naby ingange te bly.
Bewustheid van noodprosedures en uitgangs- en ontsnaproetes binne winkelsentrums kan ook ‘n bykomende laag sekuriteit verskaf indien ‘n voorval plaasvind.
Te midde van hierdie waarskuwings het die SAPD vordering aangedui met die vermindering van sommige kategorieë van geweldsmisdaad vanjaar, danksy verhoogde polisieteenwoordigheid en aktiewe toepassing, maar die getalle bly kommerwekkend.
Met misdaadstatistieke wat ‘n aanhoudende risiko in bevolkte gebiede aandui, moedig die SAPD en sekuriteitsfirmas kopers aan om ‘n defensiewe ingesteldheid aan te neem en nie deur die feestelikhede in ‘n valse gevoel van veiligheid gesus te word nie.
