Vier vermeende mensehandelaars is op die N1 tussen die Beitbrug-grenspos en Musina in Limpopo in hegtenis geneem.
Die verdagtes, insluitend ‘n vrou, het tien kinders, ses meisies en vier seuns, van Zimbabwe na die land vervoer. Die polisie sê die vermeende mensehandelaars het versuim om die nodige wettige dokumente voor te lê.
Die minibustaxi wat minderjariges vervoer het, was op pad na Johannesburg in Gauteng.
Die polisie sê die bestuurder het vir hulle gesê dat hy die kinders vervoer het om hul ouers te besoek, aangesien die skole gesluit het. Die slagoffers van vermoedelike mensehandel is na die Musina-slagofferbemagtigingsentrum geneem vir veilige bewaring.
Intussen sal die verdagtes volgende week Dinsdag voor die Musina-landdros verskyn. Hulle sal teregstaan op aanklagte van mensehandel en oortreding van die Immigrasiewet.
