Dissiplinêre verhore waarby lede van die Suid-Afrikaanse Polisiediens betrokke is, het die afgelope 11 jaar met meer as 70% gedaal.
Dit is volgens die polisie- en sekuriteitskenner Johan Burger.
Die African Transformation Movement het kommer uitgespreek oor wat hy die voortdurende onthullings van ongebreidelde korrupsie binne die SAPD genoem het.
Daar word gesê dat die onafhanklike polisie-ondersoekdirektoraat 177 aktiewe korrupsiesake teen polisiebeamptes in die 2022/2023-verslagjaar aangemeld het.
Dit het gewys op die feit dat publieke vertroue in die polisie op ‘n allemintige laagtepunt is, met beduidende gedeeltes van die bevolking wat min tot geen vertroue uitspreek in die SAPD se vermoë om die wet onpartydig te handhaaf nie.
In ‘n afsonderlike voorval het die DA die gebrek aan optrede teen die Ekurhuleni metropolitaanse polisiedepartement se adjunkhoof, Julius Mkhwanazi, bevraagteken te midde van bewerings van bedrog en korrupsie.
Volgens die DA is Mkhwanazi eerder tot die rol van waarnemende hoof bevorder.
Die posbekleër, Isaac Mapiyeye, is geskors hangende ’n ondersoek na bewerings van seksuele aanranding.
“Dit is veral sedert tussen 2017 en 2019, toe daar ‘n duidelike daling was, ek dink met 50% in daardie jaar alleen dat, wat dissiplinêre verhore betref, met ‘n effense toename in die afgelope twee boekjare,” het Burger gesê.
Burger meen daar is ‘n behoefte om dissiplinêre prosesse te versterk om wangedrag in die SAPD hok te slaan.
Hy het gesê hoewel die polisie wel keuringsprosesse het wanneer hulle nuwe lede werf, word dit deur korrupsie ongedaan gemaak.
“Vir ander kwessies soos korrupsie dink ek die polisie het ‘n relatief goed funksionerende teenkorrupsie-eenheid in plek. Maar dit het duidelik meer hulpbronne nodig.”
