Die hoogspringer was etlike dae vermis.
Die voormalige SA hoogspringer en wêreldkampioen, Jacques Freitag, wat al etlike weke vermis was, is dood in Pretoria gevind.
Volgens Netwerk24 is die 42-jarige se lyk Maandagmiddag in Pretoria-Wes ontdek. Die publikasie het gesê hy is geskiet en sy lyk is in die veld in die omgewing van die Zandfontein-begraafplaas gevind.
Freitag se suster, Chrissie Lewis, het verlede week ‘n beroep gedoen om hulp om haar broer op te spoor nadat hy op 17 Junie vermis geraak het.Volgens verskeie berigte is Freitag in die nag deur ‘n man by sy ma se huis in Bronkhorstspruit opgelaai en toe nooit weer gesien of van gehoor nie.
“Met hartseer om te sê. Ons moet rapporteer dat my broer Jacques Freitag vermis word,” het Lewis verlede week op ‘n sosiale media-plasing gesê.
“Laas lewend gesien op 12 Junie. Hy is in ’n bos in Booysens, Pretoria-Wes afgelaai.”
Sondagpublikasie Rapport het gesê die 2003 Parys-wêreldkampioen in hoogspring het met dwelmgebruik gesukkel sedert hy sy sporrtskoene opgehang het.
Freitag het glo ook sy werk as afrigter by Tuks (Universiteit van Pretoria) verloor omdat hy ‘n persoon van die straat af gebruik het om by geleentheid vir hom in te staan wanneer hy nie kon afrig nie. Rapport het ook gesê hy het die geld van atlete in sy sak gesteek wat vir byeenkomsinskrywings bedoel was.
“Ons was die afgelope paar jaar glad nie naby mekaar nie as gevolg van die dwelms,” het Freitag se suster Lewis aan die koerant gesê.
“Ek is ‘n enkelma en moes na my kinders kyk en hulle beskerm. Hy was die meeste van die tyd op dwelms.”
