Suikerbosrand Natuurreservaat brand al meer as twee dae. Brandbestryders werk hard om die brand te beheer en wild te beskerm.
Die Suikerbosrand-natuurreservaat naby Heidelberg is al meer as twee dae aan die brand.
Parapara Makgahlela, provinsiale kommunikasiebeampte vir Working on Fire, het gister aan The Citizen by die natuurreservaat gesê die brand het Sondagmiddag ontstaan en brand steeds.
“Die Working on Fire-Kishugu gesamentlike onderneming het 28 brandbestryders uitgestuur om die verwoedelike brand in die natuurreservaat te onderdruk.
“Sedert die brand twee dae gelede uitgebreek het, het ons net een span om die brand te bestry. Ons doen ons bes om die brand onder beheer te bring en enige lewensverlies en vernietiging van eiendom te vermy.
“Ons het verskeie brandbestryders wat daarna omsien,” het Makgahlela gesê.
“Die gras is droog en vatbaar vir brande hierdie tyd van die jaar. Ons brandbestryders is professioneel opgelei om dodelike brandvoorvalle soos hierdie een te hanteer.
“Die brand is steeds aan die gang in bergagtige terrein en die hoeveelheid hektaar kan eers bepaal word nadat alle brande onderdruk is.
“Die meeste van die brandbestryders is uitgestuur namate die intensiteit van die brand toegeneem het.”
Makgahlela het gesê die natuurreservaat het ‘n verskeidenheid wild wat uit die inferno gered moes word.
Hy het die gemeenskap versoek om nie vure sonder toesig te los, brandende sigaretstompies op die grond te gooi of enigiets te doen wat ‘n vlam kan veroorsaak nie.
Toe The Citizen by die reservaat aankom, het die brand steeds gewoed en is voëllewe en diere in die verkoolde omgewing gesien. ’n Groep brandbestryders was besig om die brand bo-op ’n berg te probeer blus.
Die natuurreservaat huisves onder meer sebras, jakkalse, bobbejane en verskillende spesies wildsbokke.
Stephen Boyes, hoofbestuurder van Working on Fire, het gesê Gautengse brandbestryders het reeds 155 brande bestry. Hy het gesê 288 brandbestryders is regoor Gauteng ontplooi om veldbrande in die winterbrandseisoen te takel.
Hy het gesê die span het brandbane gebrand en brande onderdruk.
“Daar is hierdie maand ‘n oplewing in terme van brande. Die plantegroei is droog en die impak van klimaatsverandering kan die intensiteit, frekwensie en verspreiding van veldbrande vererger.
“Ons doen ‘n beroep op mense om nie vure te maak, dit sonder toesig te laat of brandende sigaretstompies weg te gooi nie,” het Boyes gesê.
Hy het gesê nog brande word op verskillende plekke regoor die provinsie verwag.
Boyes het gesê baie van die brandpermitte vir die brandbane sal môre verval, wat beteken dat grondeienaars hul brandbane reeds moes voorberei het.
Hy het grondeienaars versoek om waaksaam te wees omdat brande waarskynlik sal uitbreek.
“Dit is winderig, droog en warm. Ons brandbestryders is toegewyd aan die taak om die vlamme te bestry.
“Sommige van hulle was onlangs in Kanada besig om woedende brande te bestry. Die Working on Fire-Kishugu gesamentlike onderneming gebruik die brandgevaar-indeks as ’n graderingstelsel wat die brandrisiko vir ’n spesifieke area op ’n spesifieke dag aandui.”
Die Nasionale Veld- en Bosbrandwet van 1998 weerhou mense daarvan om brandstroke te brand tensy die brandweerowerhede brandpermitte uitgereik het.
Die gesamentlike onderneming het verlede week ’n verklaring uitgereik waarin geskat word dat 4 688 hektaar grasveld sedert die begin van die brandseisoen deur veldbrande verskroei is.
