Suid-Afrika blyk ’n beduidende stap nader aan energiesekerheid te wees ná die aanvaarding van die Wysigingswetsontwerp op Elektrisiteitsregulasie (ERA) deur die Nasionale Raad van Provinsies (NRV) verlede week.
Al wat oorbly, is dat president Cyril Ramaphosa “sy pen moet vind” en die wetsontwerp onderteken. Belanghebbendes in die bedryf doen ‘n beroep op die President om die wet so vinnig as moontlik te finaliseer om die vele voordele daarvan te ontsluit.
Die ERA-wetsontwerp sal onafhanklike kragprodusente toegang tot die land se elektrisiteitsnetwerk toelaat en die ondertekening daarvan sal na verwagting aansienlike investering in die alternatiewe energiemark aanwakker.
Die wetsontwerp sal ook ‘n nasionale raamwerk verskaf vir die verspreiding van elektrisiteit tussen private maatskappye, ook bekend as wheeling.
Daar word uiteindelik verwag dat dit energie goedkoper, skoner en meer betroubaar sal maak, sê dr Rethabile, HUB van die Solar PV Industry Association (SAPVIA).
“Die wetsontwerp sal die mark oopmaak vir verskaffers van elektrisiteit en ons baie nader aan ‘n mededingende mark bring,” het Melamu gesê.
“Daar is verskeie voordele wat die wetsontwerp sal meebring, maar die wetsontwerp maak voorsiening vir die sistematiese ontbondeling van Eskom in ’n transmissiestelseloperateur en markoperateur en versnel investering in bykomende opwekkingskapasiteit en ondersteunende infrastruktuur.”
Melamu het die aanvaarding van ERA deur die Nasionale Raad van Provinsies as ‘n belangrike geleentheid beskryf en gesê die bedryf sien daarna uit om die geleenthede te benut wat dit sal ontsluit, terwyl dit die land nader aan werklike energiesekerheid bring.
Niveshen Govender, Uitvoerende Hoof van die SA Windenergievereniging (Sawea), het gesê die wetsontwerp sal die verhoog skep vir ‘n meer gestruktureerde en verantwoordbare energiebedryf in Suid-Afrika.
“Sleutelbepalings van die ERA-wetsontwerp, soos die vestiging van ‘n oopmarkplatform vir mededingende elektrisiteitsverhandeling en die skep van ‘n transmissiestelseloperateur (TSO), is gereed om nuwe geleenthede vir windenergie-ontwikkeling te ontsluit,” het Govender gesê.
“Hierdie maatreëls behoort netwerktoegang te stroomlyn en meer elektrisiteitstransaksies te fasiliteer, wat groter integrasie van nuwe windkrag in Suid-Afrika se energiemengsel moontlik maak.”
