Die Polisie- en Gevangenisburgerregte-unie (POPCRU) het die Suid-Afrikaanse Polisiediens (SAPD) se besluit verwelkom om 353 voormalige speurders op ‘n eenjaarkontrak weer aan te stel en gesê dat die stap sal help om die toenemende druk op die oorbelaste ondersoekeenheid te verlig.
“Hierdie dringende maatreël kom op ‘n tydstip wanneer die SAPD ‘n kritieke tekort aan speurders in die gesig staar, wat die ondersoek en oplossing van kriminele sake regoor die land ernstig beïnvloed het,” het POPCRU gesê.
Die vakbond het gesê dat speurders regoor Suid-Afrika onder uiterste saakladings buk, met elke beampte wat dikwels tussen 200 en 300 dossiere bestuur. In sommige provinsies hanteer speurders tot 500 dossiere elk.
POPCRU het gesê hierdie situasie is beide onvolhoubaar en nadelig vir die effektiewe regspleging, en bygevoeg dat die agterstand van 1,9 miljoen sake vervolgings vertraag en slagoffers tydige geregtigheid ontsê.
POPCRU het beklemtoon dat hoewel die werwing van nuwe konstabels in speurdienste ‘n welkome langtermyn-intervensie is, dit jare sal neem om hulle tot volle bevoegdheid op te lei.
“Die onmiddellike heraanstelling van ervare speurders, reeds opgelei in gespesialiseerde ondersoekwerk, bied ‘n deurslaggewende korttermyn-intervensie om hierdie las te verlig,” het die vakbond gesê.
Om die heraanstellings te ondersteun, het POPCRU bevestig dat hulle ingestem het tot ‘n toelaag van R1 000 vir elke terugkerende beampte.
“Dit is ‘n erkenning van beide die dringendheid en die waarde wat hierdie bekwame beamptes tot die stryd teen misdaad bring.”
Die vakbond het die breër uitdagings wat die speurdiens teister, uitgelig, insluitend 2 344 vakante poste regoor die land, die verlies van meer as 8 400 speurders tussen 2016 en 2023, onvoldoende opleiding vir nuwe rekrute en swak hulpbronne.
Dit het bygevoeg dat lae moraal en interne disfunksie die diens se kapasiteit verder ondermyn.
POPCRU het gesê die inisiatief moet ondersteun word deur ander hervormings wat reeds aan die gang is, insluitend die herontplooiing van 3 469 konstabels na speurdienste en verbeterde befondsing.
“Ons doen ‘n beroep op alle belanghebbendes binne die strafregsgroep om te verseker dat hierdie heraangestelde speurders die nodige hulpbronne, institusionele ondersteuning en gunstige werksomstandighede kry om hul pligte effektief uit te voer,” het dit gesê.
“Misdaad in Suid-Afrika vereis ‘n bekwame en goed toegeruste ondersoekmag, hierdie heraanstelling is ‘n noodsaaklike en praktiese stap in die rigting van daardie doelwit.”
Mag hulle so gekwalifiseerd wees dat hulle “dockets” wat lê en stof vergader gaan uitkrap. Hoe sê die Engelse “it remains to be seen. The proof is in the pudding.”
