Die staat het amptelik die aanklagte teen Rudolf de Wet, die tweede beskuldigde in die gruwelike Onverwacht-varkplaas-dubbelmoordsaak, teruggetrek nadat hy as ‘n staatsgetuie bevestig is. Die hofsaak neem ‘n aanvang vanaf 6 tot 17 Oktober 2025.
Volgens Polokwane Review het De Wet vanoggend in die Limpopo Hooggeregshof verskyn na aanleiding van sy versoek vroeër vandeesweek om as staatsgetuie te dien in ruil vir immuniteit teen vervolging.
Die voormalige plaasopsigter het onder Zachariah Olivier, die eerste beskuldigde in die saak, gewerk.
Olivier, saam met voormalige werknemer William Musora, ‘n Zimbabwiese burger, staan steeds tereg op aanklagte van voorbedagte moord, poging tot moord, besit van ‘n ongelisensieërde vuurwapen en ammunisie, en regsverydeling.
Musora staan ook tereg op ‘n bykomende aanklag van onwettige immigrasie.
Die saak spruit voort uit die moorde op Lucodia Ndlovu en Maria Makgatho, wat na bewering geskiet is nadat hulle die Onverwacht-plaas buite Polokwane in Augustus 2024 binnegegaan het op soek na kos.
Die vroue se liggame is na bewering van ontslae geraak deur dit aan varke te voer. Ndlovu se lewensmaat is ook geskiet, maar het die aanval oorleef.
Die staat moet steeds sy bewerings in die hof bewys, maar De Wet se getuienis sal na verwagting ‘n sleutelkomponent in die saak teen Olivier en Musora wees.
