Lopez sê: “Die meeste politieke partye, insluitend die MKP, praat oor hul minagting vir geslagsgeweld en geweld teen kinders, maar dit word nie in hul optrede weerspieël nie.”
Die vrou wat die voormalige Springbok-afrigter Peter de Villiers van seksuele aanranding beskuldig, sê sy voel gewalg dat die uMkhonto weSizwe Party (MKP) hom in sy geledere verwelkom het.
Patricia Lopez (59) het verlede jaar in ‘n onderhoud met Rapport as die klaagster in die saak teen De Villiers na vore gekom en dit bekend gemaak. Sy het beweer hy het probeer om haar vas te pen, haar te soen en op die bed by haar huis te gooi toe hulle lede van die GOOD Party was.
Foto’s van De Villiers en MKP se adjunkpresident, John Hlophe, is onlangs op sosiale media gedeel met die voormalige Springbok-afrigter wat ‘n MKP-hemp aangehad het. De Villiers het nie gereageer op herhaalde pogings om sy kommentaar te kry nie, maar Lopez het gesê dit is duidelik dat die party nie bewerings van seksuele aanranding ernstig opneem nie.
Hlophe het glo De Villiers se skuif om by die MKP aan te sluit tydens ‘n vergadering by sy plaas in die Paarl in die Wes-Kaap georkestreer. De Villiers het agterna in ’n podcast-onderhoud gesê hy is entoesiasties oor sy nuwe politieke tuiste en beplan om die “waardigheid” van die mense van die Wes-Kaap te herstel.
Lopez het gesê dit is vir haar onverstaanbaar dat die MKP De Villiers as ‘n nasionale held en ‘n bate vir die party geprys het terwyl hy vir poging tot seksuele aanranding en crimen injuria vervolg word.
Sy was ook ontevrede dat De Villiers aangehou het om sy openbare beeld te behou en sy politieke loopbaan voort te sit terwyl die hofsaak teen hom nie afgehandel is nie.
Die GOOD-party het De Villiers ná ’n interne ondersoek geskors en hy het ook sy posisie as lid van die provinsiale wetgewer verloor. Hy moet volgende maand weer in die Malmesbury-landdroshof verskyn.
