Dit mag klink na sensasionele nuus, maar hierdie is weer eens ‘n waarskuwing aan ouers om nie foto’s en video’s van hul kinders op sosiale media te plaas nie en te alle tye te verseker hulle het toegang en beheer oor hul kinders se sosiale media betrokkenheid – dis ‘n plig en verantwoordelikheid.
Internasionale wetstoepassers het ‘n teiken in Suid-Afrika geïdentifiseer en inligting met die polisie gedeel, wat tot die verdagte se inhegtenisneming gelei het.
Generaal-majoor Mmantsheke Lekhele, die komponenthoof vir gesinsgeweld, kinderbeskerming en seksuele misdrywe (FCS), het die operasie saam met ondersoekers van die nasionale en Gautengse provinsiale reeks- en elektroniese misdaadondersoekeenhede (SECI) gelei en met ‘n lasbrief vir deursoeking-en-beslaglegging uitgevoer.
Die beamptes het Vrydagoggend ‘n verwyderingsoperasie begin en een verdagte gearresteer vir die besit, toegang, aflaai en verspreiding van kinderpornografie. Hy is ook na 17:00 gistermiddag aangekla vir die besit van dwelms en bedrog. Daar is ook beslag gelê op ‘n groot bedrag kontant wat die opbrengs kan wees van die misdade.
“Tot dusver het die SAPD-span ‘n skatting van 10 miljoen kinderpornografiese beelde en video’s op verskeie elektroniese toestelle gevind,” het die SAPD berig.
Lede van die Suid-Afrikaanse Polisiediens (SAPD) was Vrydagmiddag nog steeds besig om die toneel in Midrand te fynkam vir bewyse van die kinderpornografie-verwante aanklagte.
Luitenant-kolonel Amanda van Wyk, nasionale SAPD-woordvoerder, het gesê ondersoekers het beslag gelê op verskeie elektroniese toestelle wat vermoedelik materiaal vir seksuele misbruik van kinders bevat.
“‘n Forensiese ontleding van hierdie toestelle is op die toneel deur kubermisdaaddeskundiges gedoen, ‘n geskatte getal van 10 miljoen kinderpornografiese beelde en video’s is tot dusver opgespoor,” het van Wyk gesê.
“Verdere ondersoek deur die SECI-spanne het aan die lig gebring dat die verdagte kinderpornografie op ‘n wêreldskaal aanbied en versprei vir finansiële gewin,” het van Wyk bygevoeg.
Ondersoekbeamptes het ook beslag gelê op ‘n groot bedrag kontant wat vermoedelik opbrengs van misdaad is.
Die 35-jarige sal volgende week voor die Randburg-landdroshof verskyn, terwyl die ondersoek voortduur.
Owerhede sal die verdagte se identiteit weerhou totdat hy formeel in die hof pleit.
In die afgelope twee jaar het die polisie 21 verdagtes in hegtenis geneem op aanklagte wat verband hou met kinderpornografie landwyd en daar is steeds meer sulke predatore wat vryelik onder ons woon.
In Desember het ’n voormalige onderwyser en skoolhoof in die Pretoria-landdroshof verskyn omdat hy na bewering pornografie aan kinders blootgestel het en drie skoolseuns seksueel ge”groom” het.
Die 41-jarige het tereggestaan op drie aanklagte van die blootstelling van pornografie aan kinders en vier aanklagte van seksuele voorbereiding van twee 13-jariges en een 15-jarige seuns wat leerder is aan Raslouw Akademie.
Lumauka Mahanjana, streekwoordvoerder van die nasionale vervolgingsgesag (NVG), het beweer dat die oud-onderwyser die drie seuns in Augustus 2024 gekontak het.
Hy het na bewering vir die leerlinge naakfoto’s van homself gestuur en versoek dat hulle hul naakfoto’s aan hom stuur in ruil daarvoor.
Die beskuldigde het na bewering ‘n foto van een van die kinders versoek en ontvang, toe die leerling per video gebel en voortgegaan om te demonstreer dat hy sy penis in ‘n bottel steek.
“Een van die slagoffers het die saak by die skoolonderwyser aangemeld, wat versoek het dat hulle hul fone skool toe bring vir waarneming,” het Mahanjana gesê.
“Die ouers van die slagoffers is deur die skool oor die voorval ingelig, en ’n saak is in Augustus 2024 teen die beskuldigde geopen.”
Op 31 Desember 2024 is die verdagte op borgtog van R10 000 vrygelaat.
Die saak is tot 27 Maart 2025 vir verdere ondersoek uitgestel.
Ongelukkig is dit makliker om sake wat aangemeld is, onder die mat in te vee, veral as dit hooggeplaasdes in beheer- of ampsposisie impliseer. Sommige sake dateer sover terug as 2016.
Die onderstaande het in Julie 2023 in die media verskyn en sedertdien het nog geen verdere inligting van suksesvolle vervolging na vore gekom nie:
“EEN van die sleutelredes waarom Suid-Afrika sukkel om mensehandel te bekamp, is die betrokkenheid van die regering en wetstoepassingsowerhede, volgens die jongste US Trafficking Persons Report.
Luidens die verslag was amptenare van die departement van binnelandse sake, die departement van maatskaplike ontwikkeling, die SA Polisiediens (SAPD), en die Direktoraat vir Prioriteitsmisdaadondersoek (Hawks) die sleutelentiteite wat betrokke was.
Tydens die uitvoering van die navorsing is getuienisse ingesamel van waarnemers en regeringsamptenare wat wydverspreide korrupsie aangemeld het, veral van vier regeringsentiteite. Die verslag het bevind dat hoëvlak-wetstoepassingsbeamptes mensehandelondersoeke dikwels belemmer het.
Luidens die verslag het waarnemers onthul dat, in ruil vir omkoopgeld, laervlak-amptenare handelaars gewaarsku het teen operasies deur wetstoepassing en immigrasie, en ongedokumenteerde toegang vir handelaars by land- en luggrenspunte vergemaklik het. Daar is ook berig dat die departement van maatskaplike ontwikkeling oorlewendes aan handelaars terugbesorg het in plaas daarvan om hulle na sorg te verwys.
Daar is ook berig dat sommige SAPD-beamptes nie bereid was om sake te ondersoek nie, veral dié van kinders wat gedwing is om betrokke te raak by straatsmouse of bedel. Dit het gesê dat SAPD-lede staatmaak op nie-regeringsorganisasies (NRO’s) om slagoffers se verklarings te bekom en sake op te bou.”
Hierdie artikel het op 17 Januarie 2024 in die media verskyn:
“Minister van polisie se ‘vertroueling’ is gewikkel in die Valke se seksondersoek van mensehandel.
Die voertuig van Shantal Redhi, Marimuthu se dogter wat vir die polisie se geheime misdaadintelligensie-eenheid werk, is na bewering gebruik om die slagoffers te vervoer. Die huis waaruit die vroue bevry is, word deur Marimuthu se seun, Lovendren Marimuthu, as sy huis- en besigheidsadres gelys. Ten spyte van die beslaglegging op forensiese bewyse, het die Valke-ondersoek al byna twee jaar gesloer met geen arrestasies of einde in sig nie.”
Dis tyd dat dié wat nie hul werk doen om slagoffers se reg op finalisering van die misdade wat teen hulle gepleeg is, die ou “dockets” gaan uithaal, hul integriteit wys en dié misdadigers, waarvan baie vryelik onder ons beweeg, tot verantwoording bring.
