Valke in die Noord-Kaap het drie verdagtes suksesvol in verband met bedrog, korrupsie en geldwassery gearresteer.
Schalk Pienaar, sy vrou Leolene Pienaar en Patricia Booysen staan tereg op 39 aanklagte van korrupsie, 48 aanklagte van bedrog en 78 aanklagte van geldwassery.
Hulle is op verskillende plekke in hegtenis geneem en het ‘n kort hofverskyning voor die Prieska-landdroshof gemaak en is borgtog toegestaan.
Die bewerings dateer terug van April 2020 tot Oktober waarin die trio glo ’n maatskappy genaamd GWK met meer as R700 000 bedrieg het.
Pienaar was in diens as ‘n toesighouer by ‘n brandstofstasie en hy het sy vrou, Leolene, op bedrieglike wyse as ‘n verskaffer geregistreer. Booysen was die administrasieklerk en het na bewering vervalste fakture ingedien.
Provinsiale Valke-woordvoerder, Tebogo Thebe sê: “Die Valke se Ernstige Kommersiële Misdaad Ondersoekspan het ‘n 37-jarige Schalk Pienaar, 34-jarige Leolene Pienaar en 34-jarige Patricia Booysen in hegtenis geneem. Die trio staan tereg op 39 aanklagte van korrupsie, 48 aanklagte van bedrog en 78 aanklagte van geldwassery. Hulle het ‘n kort hofverskyning voor die Prieska-landdroshof gemaak. Al drie beskuldigdes is borgtog van R1 000 vir mnr en mev Pienaar toegestaan en Booysen is borgtog van R300 toegestaan. Die saak is tot 12 Februarie uitgestel.”
