SA Rugby-president Mark Alexander het hulde gebring aan die voormalige Springbok-slot en afrigter John Williams, wat vroeër vandag dood is.
Williams is oorlede aan leukemie, op die ouderdom van 78. Hy het tussen 1971 en 1976 13 toetse vir Suid-Afrika gespeel en die Curriebeker drie keer as speler saam met die destydse Noord-Transvaal in 1973, 1974 en 1975 gewen.
Williams wat ‘n volle 2.1m in sy sokkies gestaan het en in die tweede ry gesak het, het die Bulle in 1987 en 1988 tot Curriebeker-titels afgerig, terwyl hulle in 1989 die trofee met die Westelike Provinsie gedeel het. Hy is toe in 1992 as die eerste Bokafrigter na isolasie aangestel toe die Bokke hul pad terug na die internasionale arena gemaak het; ‘n posisie wat hy vir vyf toetse beklee het.
Williams, wat op 29 Oktober 1946 in Johannesburg gebore is, het na die Bulle teruggekeer nadat sy Bokafrigtingstyd geëindig het toe hy in 1993 deur Ian McIntosh vervang is.
Ná sy rugby- en akademiese loopbaan aan die Noordwes-Universiteit, waar hy studentedekaan was, het Williams in 1999 na die familieplaas in Limpopo verhuis waar hy met vee en wild geboer het. Hy was ook ’n voormalige voorsitter van Agri Limpopo en het die provinsie se Boer van die Jaar-toekenning gewen.
“John Williams was een van net ses mense wat vir Suid-Afrika gespeel het en toe ook die Bokke ná eenheid in 1992 afgerig het, saam met Carel du Plessis, Nick Mallett, Rudolf Straeuli, Allister Coetzee en Rassie Erasmus,” het Alexander gesê.
“Hy was ‘n “tough-as-nails” slot en ‘n puik lynstaanspringer, en weens sy kennis van die spel het hy ‘n suksesvolle loopbaan in afrigting gehad, hoewel die terugkeer na die toetsarena in 1992 ‘n moeilike tyd was vir die Bokke.
“Die Bulle-spanne van die laat 1980’s het die kenmerk van sy afrigting gedra en was byna onstuitbaar aangesien hulle die plaaslike rugbytoneel vir ‘n aantal jare oorheers het.
“As ‘n ware rugbyman het John teruggeploeg in die wedstryd nadat hy sy stewels opgehang het en hy het ‘n lojale ondersteuner van beide die Bulle en die Springbokke gebly. Ons innige meegevoel met sy familie, vriende en geliefdes in hierdie baie hartseer tyd van rou.”
