Slagoffers is van hul eie geweer beroof nadat hulle geskiet is en die polisie het motoriste gemaan om hul eie veiligheid in ag te neem voordat hulle ander bystaan.
Twee mans is geskiet nadat hulle in die vroeë oggendure langs ‘n stilstaande voertuig stilgehou het.
Daar is Sondag omstreeks 02:30 langs die R40 naby die Krugerwildtuin op die broers losgebrand.
Die slagoffers, wat deur die polisie as “barmhartige Samaritane” beskryf word, was glo vertroud met die voertuig waarby hulle gestop het om te help en is later van hul eie vuurwapen beroof.
Die polisie rapporteer dat die slagoffers naby die voertuig gestop het omdat hulle geglo het die insittendes het hulp nodig gehad.
Die oomblik toe hulle stilgehou het, het ‘n onbekende gewapende man op die mans losgebrand en een in die onderlyf en die ander in die rug gewond.
Nadat hulle skietwonde opgedoen het, is die broers beroof, met die aanvallers wat ‘n geweer geneem het wat hulle in hul besit gehad het.
“Hulle is van een vuurwapen beroof. Ná die skietery en roof het een van die slagoffers daarin geslaag om na die hospitaal te ry vir mediese aandag,” het Kaptein Magonseni Nkosi, Mpumalanga polisiewoordvoerder, bevestig.
“Een van die slagoffers het in die hospitaal aan sy beserings beswyk,” het kapt Nkosi bevestig.
Indien lede van die publiek enige inligting oor die skietery het, word hulle versoek om die polisie so gou moontlik te kontak.
Zeph Mkhwanazi, Mpumalanga polisiekommissaris, het motoriste gevra om hul eie veiligheid in ag te neem wanneer hulle probeer om ander by te staan.
Die waarnemende kommissaris het gemeenskapslede versoek om eers die owerhede te kontak voordat hulle hulself in potensieel gevaarlike situasies plaas.
