Gevangenes by die Boksburg-korrektiewe fasiliteit het na bewering ‘n brand gestig om te verhoed dat beamptes ‘n sel binnegaan om ‘n selfoon by een van hulle te konfiskeer.
Die departement van korrektiewe dienste (DKD) het in vennootskap met die Suid-Afrikaanse Polisiediens (SAPD) landwye tronkstrooptogte begin in ’n poging om wetteloosheid hok te slaan.
Dit kom nadat ‘n video opgeduik het van ‘n gevangene wat spog oor sy gemaklike lewe by Goodwood Korrektiewe Sentrum in Kaapstad.
Beamptes het Donderdagaand op die Westville-korrektiewe sentrum in Durban toegeslaan, waar die polisie op onwettige items, insluitend selfone, dwelms en geld, beslag gelê het.
‘Geen beserings’
Op dieselfde dag het hulle op die Boksburg-korrektiewe fasiliteit toegeslaan. Dit is hier waar gevangenes na bewering as teenkanting teen die klopjag ‘n brand gestig het.
Geen gevangene het beserings opgedoen nie. Amptenare het sommige gevangenes vir rookinaseming behandel.
Die nasionale kommissaris van die departement van korrektiewe dienste, Makgothi Thobakgale, het die gevangenes wat by die voorval betrokke was, veroordeel.
“Sulke onbedagsame en oneerbiedige gedrag sal nooit aanvaarbaar of geduld word nie. Die departement ondersoek die saak noukeurig om te verseker dat alle skuldiges voor die hof gebring word,” het Thobakgale gesê.
“Deursoeking en beslaglegging is deel van die prosedures wat gereeld uitgevoer word om die veiligheid van alle gevangenes en amptenare te verseker. Enige gedrag wat amptenare verhinder om hul pligte uit te voer, kan nooit geduld word nie.”
Amptenare het die skuldiges geïdentifiseer. Die DKD het ’n saak van brandstigting en opsetlike beskadiging van staatseiendom by die Suid-Afrikaanse Polisiediens aanhangig gemaak.
Die DKD is ook besig met ‘n interne ondersoek en sal alle betrokke oortreders aankla.
“Korrektiewe Dienste het ‘n stel operasionele prosedures en sal nie onregmatige gedrag binne sy fasiliteite aanvaar nie. Onbeheersde gedrag sal ingevolge die Wet op Korrektiewe Dienste hanteer word.”
Hoe gevangenes smokkel
Makgothi Thobakgale, nasionale kommissaris van Korrektiewe Dienste, het in ‘n video wat deur die departement gedeel is, verduidelik hoe gevangenes verbode items bekom.
Volgens Thobakgale gaan sommige gevangenes soggens hof toe vir verskynings en keer die middag terug met selfone.
“Ons deursoek hulle, maar baie van hierdie smokkelgoedere is in hul liggame versteek, so jy benodig hoëtegnologie-toerusting om hulle te identifiseer,” het Thobakgale gesê.
Die departement sien ook ‘n toename in families en vriende van gevangenes wat items tydens besoeke smokkel.
