Mediaverklaring – Suid-Afrikaanse Polisiediens 2024/07/21
Kantoor van die Provinsiale Kommissaris Noordwes
POTCHEFSTROOM – Die bekamping van misdaad in landelike gebiede het sukses behaal nadat die polisie agt verdagtes in twee afsonderlike voorvalle in hegtenis geneem het. In die eerste voorval wat Vrydag, 19 Julie 2024 in die vroeë oggendure aangemeld is, is inligting ontvang oor ‘n verdagte voertuig op die N14-pad (tussen Ventersdorp en Carletonville). Die Klerkskraal-polisie, bygestaan deur Potchefstroom Flying Squad, het daarin geslaag om twee taxivoertuie tot stilstand te bring en ses verdagtes, tussen 23 en 45 jaar oud, in hegtenis geneem nadat hulle nie verantwoording kon doen vir 30 skape en 18 bokke wat in die twee taxi’s gevind is nie. Hulle sal Maandag, 22 Julie 2023 in die Ventersdorp-landdroshof verskyn vir die besit van vermoedelik gesteelde eiendom.
In ‘n ander afsonderlike voorval wat later dieselfde aand aangemeld is, het Boons-polisielede wat op die R509-pad (tussen Derby en Magaliesburg) gepatrolleer was, ‘n verdagte Toyota Quantum-taxi opgemerk. Die voertuig is gestop en twee passasiers het uit die voertuig gespring en weggehardloop, maar die polisie het twee ander in hegtenis geneem. Toe hulle binne die taxi gesoek is, het die polisie 37 bokke gevind en die verdagtes kon nie daarvan rekenskap gee nie.
Die twee, onderskeidelik 30 en 38 jaar oud, sal Maandag, 22 Julie 2024 in die Koster-landdroshof verskyn vir die besit van vermoedelik gesteelde bokke.
In beide hierdie gevalle is die diere nie gemerk nie. Die Polisie wil boere weereens versoek om hul diere te merk volgens die Wet op Diere-identifikasie, 2002 (Wet No 6 van 2002), omdat baie hofsake verlore gaan as gevolg van dispute oor die behoorlike identifikasie van diere. Indien ‘n dier met ‘n geregistreerde handelsmerk of tatoeëermerk gemerk is, sal dispute vermy word.
