Ongeveer 70 onwettige immigrante wat gedeporteer gaan word, het uit die The Lindela Repatriasiesentrum in Krugersdorp ontsnap. In Lindela moet jy verby 3 veiligheidshekke en 6 wagtoring gaan om te ontsnap
“Die voorval het omstreeks 11:50 op Sondag, 17 Maart 2024 plaasgevind. Lindela word bestuur deur die fasiliteit bestuursmaatskappy EnvironMongz, wat ook sekuriteitsdienste namens die departement verskaf,” het woordvoerder Siya Qoza gesê.
“Ons ondersoek het aan die lig gebring dat daar ‘n onderonsie tussen die gevangenes en EnvironMongz-bestuur en sy sekuriteit span was. Dit was tydens hierdie woordewisseling dat 69 ongedokumenteerde buitelandse burgers ontsnap het.
‘Meer kon gedoen gewees het’
“Die departement is ontevrede oor die omstandighede en die wyse waarop hierdie ontsnapping plaasgevind het, want ons glo genoeg kon deur die bestuursmaatskappy en sy sekuriteit gedoen gewees het om hierdie voorval te voorkom.
“Daarom word die kontrak noukeurig ondersoek om te besluit oor die beste manier van aksie.”
Qoza het gesê die departement het sedertdien die toegangsbeheer en ander sekuriteit funksies by die fasiliteit oorgeneem. Dit sluit in om ‘n ander sekuriteitsmaatskappy by die hek op waak te plaas terwyl die saak ondersoek word.
“Ten tyde van die ontsnapping het die fasiliteit 1 521 ongedokumenteerde buitelandse burgers aangehou wat gewag het op deportasie.
“Die 69 ontsnaptes was deel van hierdie groep. Die meeste van hierdie 1 521 ongedokumenteerde buitelandse burgers sou vandeesweek gedeporteer word.
“Ondanks die gebeurtenis wat die naweek plaasgevind het, gaan die departement steeds voort met hierdie geskeduleerde plan om na lande van herkoms te deporteer. Die geskeduleerde deportasies is na Botswana, Lesotho, Malawi, Mosambiek, Eswatini en Zimbabwe.”
Meer as die helfte van die ontsnaptes was van Tanzanië.
“As deel van hierdie geskeduleerde plan het 622 gedeporteerdes die fasiliteit verlaat. Verlede week het die departement 1 050 individue na Malawi, Mosambiek en Zimbabwe gedeporteer.”
Nasionaliteite van ontsnaptes:
• Tanzanië: 38
• Malawi: 14
• Zimbabwe: 5
• Mosambiek: 3
• Burundi: 3
• Demokratiese Republiek van die Kongo (DRK): 3
• Lesotho: 2
• Nigerië: 1
Tweede poging aangewend
Die departement het gesê EnviroMongz het hom in kennis gestel van ‘n tweede poging tot ontsnapping wat Maandagoggend plaasgevind het, wat “onmiddellik onder beheer gebring is”.
“Een van die gedeporteerdes het beswyk aan beserings wat na bewering tydens die tweede poging tot ontsnapping gebeur het.
“Hierdie voorval is nou die onderwerp van polisieondersoek, benewens hoe die ontsnapping van 17 Maart 2024 plaasgevind het.
“As deel van die ondersoek het die polisie twee veiligheidsbeamptes in hegtenis geneem en hulle is in aanhouding.
“Intussen werk die departement saam met ander wetstoepassingsagentskappe om die ontsnaptes op te spoor. Gevolglik is een ontsnapte reeds weer in hegtenis geneem.”
In Mei 2020 het 37 buitelandse burgers uit dieselfde Krugersdorp-fasiliteit ontsnap.
Gedurende hierdie tyd het die regering sy voorneme getoon om onderpresterende diensverskaffers by die sentrum te kanselleer, asook om dit te koop sodat binnelandse sake die fasiliteit kan bestuur.
Minister van Binnelandse Sake, Aaron Motsoaledi, het beweer dat die 2020-ontvlugting ‘n binnewerk was, gefasiliteer deur die veiligheidswagte wat by die fasiliteit aangestel is en teen swak werksomstandighede betoog het.
