Die parlement se komitee oor magte en voorregte het aanbeveel dat Sinawo Tambo, Natasha Ntlangwini en Mothusi Montwedi, LP’s van Ekonomiese Vryheidsvegters (EFF), swaar strawwe opgelê word.
Dit sluit in skorsing sonder betaling vir ‘n maand en verskoning in die Huis.
Die inisieerder Penelope Magona-Dano het die sanksies aanbeveel wat die komitee aanvaar het. Dano sê die EFF-lede is herhaalde oortreders.
Hulle is onder die nege LP’s wat skuldig bevind is aan minagting van die Parlement nadat hulle tydens president Cyril Ramaphosa se begrotingstemtoespraak en die debat in Junie 2022 uit die Kamer verwyder is.
Die komiteevoorsitter Manketsi Tlhape sê die sanksies is vanaf 1 April in werking.
“Die straf ten opsigte van agbare Tambo is 30 dae skorsing sonder vergoeding. Die straf ten opsigte van agbare Montwedi, 30 dae skorsing sonder vergoeding. Die straf ten opsigte van agbare Ntlangwini is ook 30 dae skorsing sonder vergoeding.”
Tlhape het ook die strawwe teen ander EFF-LP’s uiteengesit – Naledi Chirwa, Anthony Matumba, Isaac Mafanya, Yoliswa Yako, Babalwa Mathulelwa en Paulnita Marais.
“Dan is die boete ten opsigte van agbare Matumba ‘n boete gelykstaande aan 30 dae salaris. Die boete met betrekking tot agbare Marais, ‘n boete gelykstaande aan 30 dae salaris. Die straf ten opsigte van agbare Chirwa is ‘n boete gelykstaande aan 30 dae salaris. Die boete ten opsigte van agbare Mathulelwa is ’n boete gelykstaande aan 30 dae salaris en ten opsigte van agbare Yako is die boete gelykstaande aan 15 dae salaris en die boete ten opsigte van agbare Mafanya is ook ’n boete gelykstaande aan 15 dae salaris.”
