Inwoners van Mangaung het voortgegaan om grond by Brandkop 702 en Uitbreiding 148 naby Pellissier in Bloemfontein te gryp.
Dit ten spyte van ’n hofinterdik wat die metro bekom het, wat hulle keer om grond in die gebied onwettig te beset. Thabo Covane, Vrystaatse polisiewoordvoerder, het gesê 13 mense is Saterdag (2/3) weens oortreding van die hofbevel in hegtenis geneem.
’n Saak is by Parkweg-polisiestasie geopen en die beskuldigdes sal binnekort in die hof verskyn.
Ondanks die hofbevel het die voorsitter van die Suid-Afrikaanse Nasionale Burger organisasie (Sanco) in Mangaung, Mzwandile Mbhele, gesê hy beskou nie die onlangse grondbesetting in Brandkop as onwettig nie, maar dat Sanco die hofinterdik sal bestudeer.
“Ons glo ons mense het ‘n reg op toegang tot grond omdat hulle grond van die munisipaliteit en die regering aangevra het, maar die regering vat te lank. Mense wil uit oorvol gebiede trek. In sommige wyke in Ehrlich Park sal jy gesinne van 11 mense vind wat in ‘n twee vertrek huis woon,” het Mbhele gesê.
Hy het bygevoeg dat Sanco die besetting van die grond goedkeur, solank dit sonder geweld en chaos gedoen word.
“Nou sê ons vir ons mense, hulle moet doen wat hulle eensydig besluit het, om hierdie land te beset. Hulle moet dit met waardigheid doen, hulle moet dit met respek doen, hulle moet geen verwoesting skep nie. Ons duld nie geweld as Sanco nie. Ons wil ook nie hê dat ons mense deur owerhede misbruik word nie,” het hy gesê.
Mbhele het ook ‘n beroep op die munisipaliteit en plaaslike regering gedoen om die wanhopige en behoeftige mense te ontmoet en hul lot te hoor.
Die Mangaung-munisipaliteit het die onwettige besetting van grond veroordeel, maar het geen planne uiteengesit om voldoende behuising, water en sanitasie vir die informele setlaars te verskaf nie.
“ ’n Saak is by die Vrystaatse departement van menslike nedersettings geopen. Dit sal beide ons wetstoepassing span en SAPD help om hul verantwoordelikhede op die terrein uit te voer,” het Mangaung Metro-woordvoerder Qondile Khedama gesê. Die departement is verantwoordelik vir die lewering van behuising in die provinsie.
Die metro is glo in gesprek met Sanco-verteenwoordigers om ‘n blywende oplossing oor die saak te vind.
