Die voorval volg op verskeie ander waar City Power-tegnici deur misdadigers in Alexandra beroof of gyselaar gehou is.
City Power sê hy het tegnici tydelik onttrek om ‘n beskadigde elektrisiteitspaal in Alexandra te herstel nadat twee elektrisiëns met ‘n vuurwapen beroof is.
Johannesburg se elektrisiteitsvoorsiener het dit Vrydagmiddag onthul ná die aanranding wat glo Donderdagoggend plaasgevind het.
Woordvoerder Isaac Mangena het gesê die voorval het op die hoek van 2de Laan en Londonweg gebeur.
“Vier onbekende mans het die twee elektrisiëns genader wat in ‘n stilstaande voertuig was… Die vier het ons werkers van hul persoonlike besittings, insluitend selfone en beursies, met vuurwapens beroof en toe van die toneel gevlug,” het Mangena gesê.
Hy het bygevoeg ‘n saak van gewapende roof is by die polisie geopen.
“Hierdie voorval volg op ‘n ontstellende neiging van geweld teen City Power personeel in Alexandra. ’n Paar maande gelede is ’n aandiens elektrisiën deur gemeenskapslede gyselaar gehou terwyl hulle kabels in die area herstel het.”
Tshifularo Mashava, uitvoerende hoof van City Power, het die kriminele aktiwiteite veroordeel en gevra dat stappe teen die oortreders geneem word.
“Die veiligheid van ons personeel is uiters belangrik, en ons kan nie voortgaan om dienste te lewer in gebiede waar hul veiligheid bedreig word nie,” het sy gesê.
“Ons veroordeel hierdie brutale aanvalle en doen ‘n beroep op die gemeenskap om saam te werk om ‘n veilige werksomgewing te verseker.”
Mangena het gesê in voorvalle soos hierdie moet hele spanne vir hul veiligheid onttrek word. Dit verleng die duur van diensonderbreking.
“In die afgelope paar dae is ‘n gespesialiseerde toetstoestel genaamd ‘n ‘meggar’ naby die Vasco Da Gama-skakelstasie in Alexandra gesteel terwyl ons span voorberei het om kragtoevoer af te skakel vir ‘n geskeduleerde lasvermindering.
“Hierdie voorval het hul volgende taak ontwrig, naamlik om ‘n restourasie by die Alexandra-substasie by te woon wat die koshuisverspreider raak ná herstelwerk.”
Mashava het bygevoeg dat City Power daartoe verbind is om noodsaaklike dienste te lewer, maar nie die veiligheid van werknemers en kontrakteurs sal benadeel nie.
“Ons doen ’n beroep op die gemeenskap om te help om sulke voorvalle te voorkom en ons personeel te beskerm aangesien hul primêre doelwit is om te verseker dat daar dienslewering is,” het Mashava gesê.
Mangena het gesê die nutsdiens betrek raadslede en gemeenskapsleiers rondom die township. Dit is om hulle te help om die groeiende misdaadtendens aan te spreek.
“Ons dienste bly ononderbroke in ander dele van Alexandra.”
