Meer as 1 000 verdagtes, insluitend diegene wat vir ernstige misdade gesoek word, is in Gauteng se Operasie Shanela in hegtenis geneem.
Meer as 1 000 verdagtes is die naweek in Gauteng in hegtenis geneem vir moord, poging tot moord, verkragting, sakeroof, dwelmhandel, besit van dwelms en meer misdade.
Die naweek se hoëdigtheid-operasie Shanela is deur al vyf distrikte regoor die provinsie gehou in ‘n gesamentlike poging wat verskeie wetstoepassingsagentskappe betrek het.
Dit sluit in die departement van binnelandse sake, ander wetstoepassingsagentskappe, die gemeenskapspolisiëringsforum en private sekuriteitsmaatskappye.
Vanaf Saterdag het die operasie strategiese padblokkades en geteikende klopjagte ingesluit wat daarop gefokus was om gesoekte verdagtes vas te trek.
“Tydens die operasie is meer as 800 gesoekte verdagtes vir verskeie misdade deur speurders regoor die provinsie aangekeer, met 141 arrestasies wat verband hou met misdade wat teen vroue en kinders gepleeg is,” het Gautengse polisiewoordvoerder sers. Molefi Shemane gesê.
Gauteng waarnemende provinsiale kommissaris, generaal-majoor Fred Kekana het operasies in die Wes-Rand-distrik gelei, waar geweldsmisdade soos moord, aanranding, kaping en roof algemeen voorkom.
In Kagiso is meer as 20 verdagtes gearresteer vir bestuur onder die invloed van drank.
Veertig aangehoue verdagtes was onwettige immigrante, nog drie is vasgetrek vir die besit van dwelms, en twee ongelisensieerde drankwinkels is gesluit vir nie-nakoming.
Volgens Shemane sal die hoëdigtheid-operasie voortduur totdat ‘n aansienlike misdaadvermindering in Gauteng behaal word.
In ‘n afsonderlike voorval Donderdag het die polisie vyf verdagtes wat met ‘n sakeroof in Orange Farm verbind word, suksesvol gearresteer.
“Na aanleiding van intelligensie-geleide ondersoeke het Sapd-lede gekoördineerde operasionele planne uitgevoer, wat gelei het tot die arrestasies en terugwinning van gesteelde items, insluitend ‘n skootrekenaar, selfoon, horlosie en vuurwapen wat in die rooftog gebruik is,” het Shemane gesê.
Wetstoepassers het Vrydag ook ‘n kaping en ontvoering in Florida gefnuik, wat gelei het tot die inhegtenisneming van vier verdagtes van tussen 25 en 47 jaar oud.
Beamptes het vinnig op die voorval gereageer en die verdagtes na Dobsonville en Lawley opgespoor. Die operasie het gelei tot die herwinning van die gesteelde voertuig (White VW Caddy) en die redding van die ongedeerde slagoffer.
