Kaapstad – Die Stad het ‘n sterk waarskuwing gerig aan diegene wat probeer om kabeldiefstal te pleeg nadat drie verdagtes wat in ‘n sloot weggekruip het helder oordag betrap is om straatligkabels langs die M5-hoofweg te probeer steel.
JP Smith, lid van die veiligheids-en-sekuriteit, het gesê waaksame beamptes het Maandag verdagte aktiwiteite onder die brug wat na Kenilworth lei, opgemerk en tydens ondersoek is die verdagtes in ‘n sloot gevind waar hulle besig was om die onlangs vervangde bekabeling vir straatligte op te grawe.
“Die verdagtes het, toe hulle die naderende beamptes gesien het, hul gereedskap laat vaar en gevlug.
“Beamptes het die verdagtes agternagesit en daarin geslaag om al drie van hulle vas te trek. Ongelukkig is die bekabeling reeds afgesny en ‘n groot gedeelte verwyder,” het hy gesê.
Die drie verdagtes is deur die metaaldiefstaleenheid in hegtenis geneem en by die Wynberg-polisiekantoor aangekla van diefstal en beskadiging van kritieke infrastruktuur, het Smith gesê.
Wayne Dyason, woordvoerder van die Stad se wetstoepassing, het gesê verskeie uitstaande diefstal- en vandalismesake moet nog aandag geniet.
“Ongelukkig het die lys vinniger gegroei as waaraan dienskontrakteurs kan aandag gee,” het hy gesê.
Volgens Dyason het ‘n aparte voorval van kabeldiefstal onder die Racecourse Road-brug wat oor die M5 loop, op 9 Mei plaasgevind. Hy het gesê dat gebiedsbeamptes die loopgrawe en kabels gesien het wat verwyder is, maar die verdagtes het reeds vertrek.
“Die gebiedsbeamptes het toe hierdie gebied gemonitor en op 13 Mei is drie manlike verdagtes op heterdaad betrap terwyl hulle kabels verwyder het,” het hy gesê.
“Hulle is gearresteer en die ondersoekbeampte sal kyk of hierdie verdagtes ook met die eerste voorval verbind kan word. Die voortdurende diefstal van kabels lei ook tot swart kolle in gebiede waar die ligte af is weens kabeldiefstal.
“Dit kan ’n omgewing skep vir opportunistiese roof van voetgangers en lei ook tot riskante rytoestande vir motoriste.”
Die polisie het ’n versoek om kommentaar na die Stad terugverwys. Hulle het bevestig hulle het die arrestasie bewerkstellig.
Die Stad het meer as 1700 kg gesteelde metaal in nege maande tussen Julie 2023 en Maart teruggekry. Meer as 53 000 miljoen se gesteelde bekabeling is oor hierdie tydperk teruggevind, met die eenheid wat ook 115 arrestasies gemaak het, insluitend die verkryging van 12 jaar tronkstraf vir ‘n metaaldief.
Smith het gesê ingevolge die Wysigingswet op Strafsake word ‘n minimum tronkstraf van drie tot 30 jaar voorgeskryf.
“Hande af van ons koperkabel! Ons sal jou vang,” het hy gesê.
Andre Smit en Volkskrag Nuus, hartlik geluk met die korrekte “Blatante M5-hoofwegstraatligkabeldiewe” !