ʼn Man se verkoolde liggaam is Dinsdagoggend by die substasie se meganiese werkwinkel in Roodepoort aangetref nadat hy vermoedelik in ʼn mislukte poging tot diefstal of vandalisme doodgeskok het.
Isaac Mangena, woordvoerder van City Power, sê die verdagte se liggaam, wat onherkenbaar verbrand het, is binne die stasie gevind toe City Power-werknemers vir diens aangemeld het.
“Dit is nog onduidelik waarmee die verdagte gepeuter het wat die elektriese skok veroorsaak het. Uit voorlopige ondersoeke lyk dit asof hy een van die staaldeure gebreek het om die substasie binne te gaan. Die stasie is erg beskadig en gaan waarskynlik ʼn nuwe skakeltuig en ringhoofeenhede (RMU) benodig,” sê Mangena.
Hy sê die substasie is sedertdien afgekamp om owerhede in staat te stel om hul ondersoeke uit te voer.
As gevolg van hierdie voorval is kragtoevoer na kliënte in dele van Florida, Hamberg en omliggende gebiede ontwrig.
Die polisie en inspekteurs is tans op die toneel besig met hul ondersoek na die voorval. Operateurs kan eers begin werk om kragtoevoer te herstel nadat die wetstoepassingsagentskappe hul ondersoek afgehandel het en die misdaadtoneel opgeruim het.
Mangena sê die span moet eers die omvang van die skade evalueer om die volgende stappe te bepaal om toevoer na geraakte gebiede te herstel.
As sodanig is City Power nie in ʼn posisie om die tyd van herstel te skat nie.
Hoewel ons simpatie het met die familie van die oorledene, is ons ontsteld deur die brutale minagting van ons elektrisiteitsinfrastruktuur.
Om by ʼn lewendige substasie in te breek en met die fasiliteit te probeer peuter, wys net tot watter mate mense bereid is om te gaan om ons infrastruktuur vir persoonlike gewin te steel en te vernietig,” sê Mangena.
Die saak word nou deur die polisie ondersoek en verdere navrae moet aan die polisie gerig word.
Your method of describing all in this article is really nice, all be able to simply know it, Thanks a lot.