Die waaksaamheid deur lede van Nyanga SAPD het gelei tot die arrestasie van ‘n verdagte toe hy met ‘n vuurwapen betrap is sonder ‘n lisensie in sy besit.
Die lede was Woensdagaand omstreeks 21:40 besig met misdaadvoorkomingspligte in New Eislebenweg, Nyanga toe hulle ‘n onbekende man aan die oorkant van die pad opgemerk het. Na aanleiding van hul instink het die lede die man agternagesit en hom deursoek. ’n 9 mm-pistool met ammunisie is in sy besit gevind. Hulle het die volwasse man in hegtenis geneem vir die besit van ‘n ongelisensieerde vuurwapen en ammunisie.
In ‘n onverwante saak het lede van Delft SAPD ‘n 20-jarige man in hegtenis geneem toe hy met ‘n rewolwer sonder ‘n reeksnommer in sy besit betrap is. Die lede was besig met misdaadvoorkomingspligte in Roosendallaan, Roosendal, Delft, toe die man die polisievoertuig sien en begin hardloop het. Die lede het hom agternagesit, die man aangekeer, hom deursoek en die vuurwapen met ammunisie in sy besit gevind. Hy staan tereg op aanklagte vir die besit van ‘n ongelisensieerde vuurwapen en ammunisie.
Die verdagtes sal Vrydag in die Athlone- en Bellville-landdroshowe verskyn op die genoemde aanklagte.
