“Dit was ‘n doelbewuste aanval.” Só het die Gautengse polisiewoordvoerder, Dimakatso Nevhuhulwi, die skaamtelose dagligskietery van die insolvensieprokureur, Bouwer van Niekerk, beskryf.
Die Prokureursorde van Suid-Afrika (LSSA) het die sluipmoord op Bouwer van Niekerk, ‘n gerespekteerde insolvensieprokureur wat verlede Vrydag by sy firma in Saxonwold, Gauteng, doodgeskiet is, veroordeel.
Volgens die polisie is Van Niekerk deur vier verdagtes doodgeskiet terwyl hy in die raadsaal van die kantoor was.
Die LSSA het Maandag in ‘n verklaring die “geteikende en brutale aanval” veroordeel.
Die organisasie het gesê geweld teen regspraktisyns is ‘n aanval op die oppergesag van die reg, openbare vertroue in die regstelsel en die grondwetlike belofte dat geskille vreedsaam deur wettige prosesse opgelos sal word.
Die LSSA het gesê Van Niekerk was ten tyde van sy dood betrokke by omstrede kommersiële en insolvensie-aangeleenthede, insluitend verrigtinge wat verband hou met sake-reddinglitigasie.
“Terwyl die omstandighede van hierdie moord steeds ondersoek word, neem die LSSA met ernstige kommer kennis van die patroon van dreigemente en aanvalle op regslui wat getaak is om korrupsie, komplekse kommersiële geskille en hoëprofiel-litigasie te konfronteer,” lui die verklaring.
LSSA-president Nkosana Mvundlela het gesê: “Mnr. van Niekerk se moord is nie net ‘n tragedie vir sy geliefdes nie. Dit is ‘n direkte aanval op die regstelsel. Wanneer prokureurs na ‘n vergadering gelok en by hul werkplek vermoor kan word, moet elke Suid-Afrikaner bekommerd wees.
“Ons doen ‘n beroep op wetstoepassing om dringend op te tree, die ondersoek te prioritiseer, diegene wat verantwoordelik is, te arresteer en enige kriminele netwerke agter hierdie misdaad te ontmantel. Die beroep moet sy werk sonder vrees of intimidasie kan doen.”
Die 43-jarige Van Niekerk wat Vrydag in die raadsaal van sy Saxonwold, Johannesburg-kantoor, doodgeskiet is, was ten tyde van sy dood na bewering besig met hoëprofielsake, insluitend ‘n groot insolvensiesaak wat gekoppel is aan ‘n beweerde Ponzi-skema.
Volgens Nevhuhulwi is niks gesteel nie.
“Toe hulle binne die raadsaal was, is skote gehoor, en die aanvallers het van die toneel gevlug,” het sy gesê.
“Die prokureur is op die toneel dood verklaar, met geen items wat as gesteel aangemeld is nie, wat dui op ‘n doelbewuste moord.
“Die polisie soek na vier verdagtes, en ondersoeke duur voort om die motief te bepaal.”
Die minister van justisie en grondwetlike ontwikkeling, Mmamoloko Kubayi, het die aanval veroordeel.
Die gewapende mans het van die toneel gevlug en die polisie het enigiemand met inligting wat die ondersoek kan help, versoek om die Misdaadstoplyn by 08600 10111 te kontak of anonieme wenke op die MySAPS-app te verskaf.
