Die Direktoraat vir Prioriteitsmisdaadondersoek, ook bekend as die Valke, het ‘n beslagleggingsbevel wat deur die Randburg-landdroshof toegestaan is, uitgevoer in wat beskryf is as ‘n beduidende sukses in die stryd teen korrupsie en georganiseerde misdaad.
Thatohatsi Mavimbela, Gautengse woordvoerder van die Valke, het gesê die beslagleggingsbevel beklemtoon die verbintenis van die Valke se Priority Crime Specialized Investigations (PCSI)-afdeling om bates wat uit kriminele aktiwiteite verkry is, te herwin en aanspreeklikheid vir alle betrokkenes te verseker.
“Die saak spruit uit ‘n 2018-voorval waarby vier polisiebeamptes en Walter Agbor van Cameroon, betrokke was en wat daarvan beskuldig word dat hulle ‘n klaer ontvoer en van R1,9 miljoen beroof het,” het sy gesê.
Die klagte wat in Mei 2018 deur die Ernstige Korrupsie-ondersoekeenheid ontvang is, het “afgryslike” betrokkenheid van individue aan wie openbare beskerming toevertrou is, uiteengesit.
“ ’n Gekoördineerde operasie deur die ondersoekspan het gelei tot die arrestasie van die verdagtes by hul onderskeie wonings. ’n Bedrag van R122 700 is by die huise van die polisiebeamptes gevond en op beslag gelê, terwyl die oorblywende gesteelde geld (sowat R160 000) by Agbor gevind is,” het sy gesê.
Alle verdagtes is by die Randburg-polisiestasie aangehou en staan tereg op aanklagte van ontvoering, roof en korrupsie.
Die saak is daarna aan die PCSI oorhandig vir ondersoeke na batebeslaglegging.
“Die onvermoeide pogings van PCSI het gelei tot die toestaan van ‘n beslagleggingsbevel, wat verseker het dat R282 500 teruggeëis word as deel van die regsproses,” het sy gesê.
Mavimbela het bygevoeg dat hierdie sukses die onwrikbare toewyding van die Valke se PCSI-afdeling beklemtoon om te verseker dat misdaad nie betaal nie en dat geregtigheid seëvier.
Die Valke het waardering uitgespreek aan alle agentskappe wat by die saak betrokke is vir hul professionaliteit en meedoënlose strewe na geregtigheid.
Al vyf beskuldigdes is tans op borgtog en word op 3 en 4 April in die Randburg-landdroshof vir vonnisoplegging verwag.
