Jessica Marieka Janse Van Niewenhuys, ‘n 35-jarige boekhouer, is tot 12 jaar tronkstraf gevonnis vir die orkestreer van ‘n gesofistikeerde belastingbedrogoperasie wat die Suid-Afrikaanse Inkomstediens (SAID) meer as R9 miljoen gekos het.
Sy is Vrydag deur die Vrystaatse afdeling van die hooggeregshof in Bloemfontein gevonnis ná ’n deeglike ondersoek deur die Valke se ernstige handelsmisdaad-ondersoekeenheid.
Janse Van Niewenhuys is saam met haar man Petrus Janse Van Niewenhuys (36) in hegtenis geneem nadat hulle in Mei 2024 na Port Elizabeth, Oos-Kaap, verhuis het. Die aanklagtes teen die man is teruggetrek.
Janse Van Niewenhuys is intussen skuldig bevind op 181 aanklagte van bedrog, tesame met 38 aanklagte van geldwassery, en is onbevoeg verklaar om ‘n vuurwapen te besit.
“Jessica, wat verantwoordelik was vir boekhouding van vier maatskappye wat in Parys gesetel was, het bedrieglike belastingopgawes namens hierdie maatskappye ingedien. Sy het verder bedrieglike opgawes ingedien namens haar man, wat destyds in diens was van ‘n maatskappy wat projekte by verskillende myne gedoen het,” het Matoti gesê.
Hoof van die Valke in die Vrystaat, generaal-majoor Mokgadi Bokaba het die vonnisoplegging verwelkom.
Sy het gesê Janse Van Niewenhuys se vonnis moet ‘n sterk boodskap aan ander misdadigers stuur en het bygevoeg dat ‘n proses aan die gang is om voordele uit hierdie misdaad te verhaal.
