’n Ma van Port Elizabeth wat glo huurmoordenaars gehuur het om haar 22-jarige seun te vermoor, het Vrydag vir die eerste keer in die New Brighton-landdroshof verskyn.
Shayhieda Dollie (49) van Gelvandale in Port Eliabeth is Woensdag 6 November in hegtenis geneem ná die dood van haar seun Moegamat Thaafir Dollie.
Moegamat is op 28 Oktober 2024 vermoor gevind.
Volgens die polisie het hy skietwonde aan sy kop en nek opgedoen.
Volgens die Nasionale Vervolgingsgesag (NVG) het Dollie, ‘n werklose vrou, probleme ondervind met haar seun, wat met dwelmverslawing gesukkel het en as ‘n oorlas by die huis beskou is.
“Sy het raad gesoek en na bewering met verskeie mense gekonsulteer wat ‘n ‘permanente oplossing’ voorgestel het,” het Luxolo Tyali, provinsiale NVG-woordvoerder, gesê.
Hy het gesê dat Dollie na bewering ‘n plan met twee individue, bekend as “Shaun” en “Oompie”, georkestreer het.
Die plan was om huurmoordenaars van Johannesburg te huur vir ‘n prys van R80 000.
Die NVG het gesê weens die beskuldigde se uitstel het die prys later tot R380 000 gestyg.
“Die plan het ontvou toe Dollie vir haar seun gesê het hy het ’n werksonderhoud en die oortreders het hom opgetel, wat uiteindelik tot sy moord gelei het.”
Tyali het gesê die motief vir die moord was na bewering om R2 miljoen se lewensversekering te eis wat gebruik sal word om die huurmoordenaars te betaal.
Benewens moord staan Dollie ook tereg op aanklagte van sameswering om moord te pleeg.
Die NVG het gesê hy sal die borgtogaansoek teenstaan.
Die saak is tot 15 November uitgestel vir profielverifikasiedoeleindes.
Oos-Kaapse polisie het bevestig dat nog arrestasies op hande is.
