Die beskuldigdes staan tereg op twee aanklagte van moord, twee aanklagte van ontvoering aanranding met die doel om ernstig te beseer
’n Plaasbestuurder en drie ander wat van moord op twee vermeende veediewe beskuldig word, is borgtog geweier.
Reinhardt Steyn, Dumisani Chriswell Masilela, Stephan Wilson en Dumisani Luthuli het Maandag in die Middelburg-landdroshof verskyn.
Die beskuldigdes staan tereg op twee aanklagte van moord, twee aanklagte van ontvoering, aanranding met die doel om ernstig te beseer en opsetlike saakbeskadiging.
Daar word beweer dat die beskuldigdes op 24 Augustus drie slagoffers by Elsias-plaas in Laersdrift buite Middelburg ontvoer en aangerand het en hulle daarvan beskuldig het dat hulle skape gesteel het.
Monica Nyuswa, woordvoerder van die nasionale vervolgingsgesag (NVG), sê die beskuldigde het na bewering saam met die slagoffers na die dorp gery op soek na die skape.
“Toe die beskuldigdes besef dat die slagoffers nie saamwerk nie, is die beskuldigdes saam met die slagoffers terug plaas toe.
“Hulle het hulle na bewering aangerand en hul liggame verbrand voordat hulle hul oorskot op die R575-pad gestort het wat na N4 in Middelburg lei,” het Nyuswa gesê.
Tydens verrigtinge Maandag het die hof gevoel dat die mans nie daarin geslaag het om die buitengewone omstandighede te bewys wat hul vrylating op borgtog toelaat nie.
Landdros Solomon Gololo het gesê die beskuldigdes se omstandighede moet in ag geneem word, maar hulle moes die hof wys hul omstandighede is uitsonderlik.
Die saak is tot 1 November 2024 vir verdere ondersoek uitgestel.
