Suid-Afrikaanse Nasionale Parke (SANParke) het bevestig dat brande Maandagaand by twee ruskampe in die Krugerwildtuin (KNP) uitgebreek het.
Ike Phaahla, woordvoerder van die KNP, het gesê die eerste brand was by Satara-kamp, waar kole van ‘n braaivleisvuur op die grasdak van ‘n chalet beland en dit aan die brand gesteek het.
“Die brand is vinnig bedwing voordat dit na ander strukture kon versprei. ‘n Soortgelyke voorval het by Olifants-ruskamp plaasgevind, wat vereis het dat drie chalets ontruim moes word. Hierdie brand is ook in bedwang gebring hoewel dit onmoontlik geblyk het om besittings van gaste te verwyder,” het hy gesê.
Phaahla het gesê geaffekteerde gaste is na ander ruskampe verskuif.
Hy het gesê die park ervaar warm, winderige en droë weer en besoekers word versoek om hul braaivleisvure onmiddellik na gebruik te blus.
“Dit sal die risiko van brand met die gevolglike skade aan strukture en die omgewing aansienlik verminder. SANParke bedank die noodreaksiespanne, veldwagters en Phalaborwa Brandweer vir hul spoedige reaksie en bystand wat die situasie gered het,” het hy gesê.
SANParke het gesê daar is geen lewens verloor of beserings by enige van die kampe nie.
