Die afpersers het ‘n slagoffer met sambokke aangerand nadat hulle nie die “beskermingsfooi” betaal het nie.
Twee vermeende afpersers is in hegtenis geneem omdat hulle na bewering geld van inwoners in Pretoria afgepers het.
Na verneem word, is die verdagtes, onderskeidelik 33 en 46 jaar oud, vandeesweek in Mamelodi-Oos geboei.
Polisiewoordvoerder, kolonel Dimakatso Nevhuhulwi, het gesê tydens hul inhegtenisneming is die twee in besit gevind van twee registerboeke en ‘n onbekende bedrag geld.
“Daar word berig dat die verdagtes gesoek is vir ‘n aanrandingsaak wat in September 2024 geopen is waarvolgens hulle die slagoffer met sambokke aangerand het nadat hulle versuim het om die “beskermingsfooi” te betaal.
“Albei verdagtes sal na verwagting op 3 Oktober 2024 voor die Palm Ridge Gespesialiseerde Handelsmisdaadhof verskyn op aanklagte van aanranding GBH en afpersing,” het Nevhuhulwi gesê.
Nevhuhulwi het mense wat slagoffers van afpersingsmisdade geword het, aangemoedig om sake te open.
“Die polisie sal met die hulp van misdaadintelligensie-inligting voortgaan om hierdie operasies uit te voer om afpersingsaktiwiteite by geaffekteerde gebiede in die Tshwane-distrik aan te spreek.”
Senzo Mchunu, minister van polisie, het Dinsdag onthul dat die Wes-Kaap die hoogste aantal afpersingsake het wat deur die Suid-Afrikaanse Polisiediens (Sapd) ondersoek word.
Die Wes-Kaap het die hoogste aantal gevalle gehad, met 119 aangemeld, gevolg deur die Oos-Kaap met 71.
Die ander provinsies het die volgende getalle gerapporteer:
Gauteng: 47
KwaZulu-Natal (KZN): 46
Noordwes: 18
Limpopo: 7
Mpumalanga: 3
Vrystaat: 1
Die Noord-Kaap is die enigste provinsie met geen oop afpersingsake wat tans ondersoek word nie.
