‘n Man wat na bewering vuurwapenreplikas gebruik het om motoriste by ‘n kruising te terroriseer en te beroof, is in hegtenis geneem.
’n Multi-belanghebbende-operasie het gelei tot die arrestasie van ’n man wat na bewering besig was om pendelaars en motoriste te terroriseer by ’n verkeerslig op die hoek van Atterburyweg en Manitoba-rylaan in Faerie Glen, oos van Pretoria.
Volgens ao Johan van Dyk, polisiewoordvoerder, is die man gister in hegtenis geneem nadat hy pas nog ‘n slagoffer beroof het.
Van Dyk sê die verdagte staan tereg op aanklagte van gewapende roof en die besit van gesteelde eiendom en ‘n gevaarlike wapen.
“Die verdagte is in besit gevind van replika vuurwapens wat hy gebruik het om sy slagoffers te beroof,” sê Van Dyk.
Emile Rheeder, woordvoerder van die Brinant Private Security-groep, sê belanghebbendes het inligting ontvang oor ‘n gewapende roof by die kruising van Atterbury en Manitoba.
Die rooftog het omstreeks 07:30 plaasgevind.
“Een lid van die Garsfontein Sektor 2 GPF was getuie van die roof en het patrolleerders, polisie en private sekuriteitsmaatskappye gewaarsku.”
Rheeder sê die spanne het na die rower begin soek.
“Kommunikasie is goed onderhou en uitgang-/ontsnappingsroetes is gesluit.”
Rheeder sê die spanne het die verdagte gesien wat ooreenstem met die klerebeskrywing wat gegee is.
“Dit het gelei tot die arrestasie van die verdagte wat al weke lank pendelaars terroriseer.”
Hy sê die verdagte is in besit gevind van twee nagemaakte vuurwapens en gesteelde eiendom, insluitend ‘n skootrekenaar, ‘n Samsung-foon en ‘n laaibank.
“Garsfontein-polisie het ’n saakdossier geopen en die verdagte aangehou.”
