Die dwelmmuil het meer as 60 pakkies van vermoedelik kokaïen in haar maag gehad.
’n 30-jarige vrou is Sondag by OR Tambo Internasionale Lughawe in hegtenis geneem nadat tientalle klein sakkies dwelms in haar maag gevind is.
Die Namibiese vrou is gevang nadat sy van ‘n vlug van Sau Paolo, Brasilië, afgeklim het.
Die polisie, SAID en immigrasiebeamptes was op soek na die vermeende dwelmmuil nadat hulle inligting van die Suid-Afrikaanse Polisiediens (Sapd) ontvang het.
“Die span het die dwelmmuil onmiddellik onderskep terwyl sy haar weg deur immigrasie gebaan het,” het brigadier Athlenda Mathe, polisiewoordvoerder, gesê.
“Sy is dadelik gearresteer, na ‘n plaaslike hospitaal geneem waar ‘n mediese X-straal bevestig het en vreemde voorwerpe in haar maag opgespoor het.”
Mathe het gesê die vrou is die tiende dwelmmuil wat die afgelope twee maande by OR Tambo Internasionale Lughawe in hegtenis geneem is.
Teen Sondagaand het Mathe gesê die verdagte het meer as 60 pakkies dwelms vrygelaat, wat vermoedelik kokaïen is.
“Die waarde van die dwelms kan nie in hierdie stadium bepaal word nie, aangesien die proses om alle vermeende dwelms uit die verdagte se liggaam vry te laat ‘n geruime tyd kan neem,” het sy gesê.
Fannie Masemola, polisiekommissaris-generaal, het die wetstoepassingspan geloof vir hul “waaksaamheid” en gewaarsku dat die polisie die georganiseerde misdaad in Suid-Afrika hokslaan.
“Ons mans en vroue in blou is hard besig om geharde misdadigers te onderskep. Suid-Afrika is nie ‘n speelplek vir misdadigers en transnasionale georganiseerde misdaad nie. Ons knyp die spasie vir misdadigers en laat niks aan die toeval oor nie,” het Masemola gesê.
