Volgens die polisie het die vuurwapen ‘n paar weke gelede verdwyn en is dit gevind met ammunisie versteek in ‘n plafon in die Bosbokrand-area.
‘n Veldwagter van die Krugerwildtuin is in hegtenis geneem in verband met ‘n vuurwapen wat ‘n paar weke gelede in Skukuza verdwyn het.
Volgens die Mpumalanga-polisiewoordvoerder, kolonel Donald Mdhluli, is die 37-jarige verdagte toevallig op Wêreldveldwagterdag, 31 Julie, in ‘n steekoperasie in hegtenis geneem na aanleiding van inligting wat deur SANParke ingesamel is.
“By die ontvangs van sulke belangrike inligting het lede van die Mpumalanga taktiese reaksiespan en ‘n span wat spesialiseer met transitorooftogte vinnig die leidrade gevolg, wat van Skukuza afkomstig is.
Deur nougesette ondervraging en ondersoekpogings is een van die veldwagters as ‘n verdagte geïdentifiseer.
Die vuurwapen is later ontbloot met sowat 18 stukke ammunisie wat binne ‘n plafon in ‘n huis in Hluvukani naby Thulamahashe in die Bosbokrand-omgewing versteek is. Daar word geglo die vuurwapen wat gevind is, kan die een wees waarna wetstoepassingsagentskappe gesoek het,” het Mdhluli gesê.
Hy het gesê die verdagte is tans in polisie-aanhouding en kan teregstaan op aanklagte wat verband hou met die onwettige besit van ‘n vuurwapen met ammunisie, asook ander relevante aanklagte wat in die ondersoek mag ontstaan, waarvan diefstal nie uitgesluit kan word nie. “Volgens standaardprosedure sal die vuurwapen ballistiese toetse ondergaan om te bepaal of dit voorheen in die pleging van misdaad elders gebruik is. Die verdagte sal binnekort in die hof verskyn,” het Mdhluli gesê.
