Die Ekurhuleni Munisipaliteit sê die stad se tegnici spreek ‘n groot rioolverstopping aan wat ‘n kruising op Ermeloweg gesluit het en wat Strubenvale- en Casseldale-paaie in die Springs middestad raak.
Stadswoordvoerder, Zweli Dlamini, wat ‘n opdatering gegee het oor die voortgesette pogings om die probleem op te los, het gesê die munisipale span het aanvanklik gereageer op ‘n rioolstorting en daarna ‘n groot verstopping saam met verskeie bottelnekke op die rioolnetwerk geïdentifiseer.
“Die span werk onverpoosd daaraan om die puin wat die rioolverstopping veroorsaak te verwyder, want as dit nie dringend herstel word nie, kan dit tot verdere besoedeling en gesondheidsgevare lei,” het Dlamini gesê.
Dlamini het gesê die werk wat uitgevoer word, sluit in die assessering van die grondvlak om te verseker dat die rioolstelsel afvalwater behoorlik sal lei; vervanging en installering van nuwe waterpype; en vervanging van beskadigde en verouderde mangate om toegang vir instandhouding te verbeter om toekomstige risikofoute te verminder.
“Die voltooiingstyd vir hierdie herstelwerk is tans onbekend, maar die munisipaliteit is daartoe verbind om die ongerief vir die publiek tot die minimum te beperk. Motoriste word aangeraai om alternatiewe roetes te soek terwyl die herstelwerk aan die gang is om vertragings te vermy en veiligheid in die gebied te verseker,” het Dlamini gesê. – SAnews.gov.za
