Tweedehandse motorhandelaars moet by die bepalings van die Wet op Verbruikersbeskerming hou wanneer hulle ‘n gebruikte of tweedehandse motor aan jou verkoop.
Die Nasionale Verbruikerstribunaal het twee motorhandelaars van gebruikte voertuie beboet en een van hulle beveel om ‘n verbruiker R1 miljoen terug te betaal nadat hulle die sake aangehoor het wat deur die Nasionale Verbruikerskommissie aanhangig gemaak is. Tweedehandse motors is dikwels ‘n probleem vir verbruikers en dit wys dat dit nie ‘n stryd is wat jy alleen moet voer nie.
Die verbruikers het by die Nasionale Verbruikerskommissie (NCC) gekla oor gebruikte motors wat hulle by Wingfield Motors en Sandton Repo Cars gekoop het. Nadat die NCC hul klagtes ondersoek het en bevind het dat die handelaars die Wet op Verbruikersbeskerming (CPA) in albei gevalle oortree het, is die sake na die Nasionale Verbruikerstribunaal (NVT) verwys.
Die Tribunaal het bevind dat Wingfield Motors, wat handel dryf as Beste Prys vir My Motor in die Wes-Kaap, artikels 55(2)(a) tot (c) en 56(2) van die CPA oortree het. Die verbruiker het ‘n tweedehandse Ford Focus RS 2.3 EcoBoost AWD 5dr 2017-voertuig vir R568 000 gekoop, maar het binne drie dae defekte ontdek wat herstelwerk op meer as R62 000 vereis het. Wingfield Motors het geweier om die voertuig te herstel.
Toe die handelaar geweier het om die motor te herstel, het die verbruiker sy reg uitgeoefen om die transaksie te kanselleer en terugbetaling gesoek soos in die CPA bepaal. Die verskaffer het geweier om die verbruiker terug te betaal, ‘n oortreding van artikel 56(2)(a) en (b) van die CPA.
Volgens artikel 55 van die CPA moet die gebruikte motor wat jy koop veilig en van goeie gehalte wees, maar hierdie afdeling is nie van toepassing as jy die motor op ‘n veiling gekoop het nie. Jy het die reg om ‘n motor te koop wat redelik geskik is vir die doel waarvoor dit bedoel is.
Die motor moet van goeie gehalte wees, in goeie toestand en vry van enige defekte, en bruikbaar en duursaam wees vir ‘n redelike tydperk, afhangende van waarvoor jy dit oor die algemeen gaan gebruik, tensy die handelaar jou uitdruklik vertel het van gebreke aan die motor en jy het reeds ingestem om dit te koop.
Siende dat die handelaar motors verkoop, kan jy ook in terme van hierdie afdeling aanvaar dat hy jou goeie raad sal gee wanneer jy verduidelik waarvoor jy die motor gaan gebruik.
Artikel 56 is ook baie belangrik wanneer jy ‘n gebruikte motor koop en waarborg dat die motor voldoen aan die standaarde wat in artikel 55 gestel word. Indien dit nie die geval is nie, kan jy die motor binne ses maande nadat jy dit gekoop het terugbesorg en die handelaar moet herstel dit, ruil dit of jou geld teruggee.
Boonop is hierdie herstelwerk vir drie maande gewaarborg en as dit binne hierdie tyd weer onklaar raak, moet die handelaar dit herstel of jou geld teruggee.
Die Tribunaal het bevind dat die optrede van Wingfield Motors die CPA oortree het en sy optrede as verbode verklaar. Daarbenewens het die Tribunaal Wingfield Motors beveel om die verbruiker ‘n bedrag van R568 000 terug te betaal en ‘n administratiewe boete van R50 000 opgelê.
Die tribunaal het in sy uitspraak gesê hy is oortuig dat ’n sterk boodskap gestuur moet word dat tweedehandse motorhandelaars nie die dwingende bepalings van die CPA kan vryspring nie.
“Hul dienste moet in lyn wees met die CPA. Verbruikers moet beskerm word teen kleinhandelaars wat die aankoopbedrag aanvaar en nie ’n verbruiker se voertuig herstel of die verbruiker terugbetaal wanneer wesenlike gebreke binne die voorgeskrewe tydperk manifesteer nie.”
Sandton Repo Cars is ook beveel om ‘n verbruiker die volle koopprys van R459 900 vir ‘n 2018 Volkswagen TSI Golf-R motorvoertuig terug te betaal. Sandton Repo Cars het beweer die voertuig was ongeluksvry toe dit aan die verbruiker verkoop is, maar kort nadat die voertuig afgehaal is, het die verbruiker gebreke daarin opgemerk.
Die verbruiker het die transaksie gekanselleer en ‘n terugbetaling geëis, maar die verskaffer het geweier om hom terug te betaal. Die NCC se ondersoek het aan die lig gebring dat die voertuig in ‘n ongeluk betrokke was voordat die verbruiker dit gekoop het en boonop is hy verplig om ‘n Mechaniese Onklaarstelling Waarborg Weiering Kennisgewing te onderteken, wat die verskaffer vrygespreek het van enige defekte wat na afhaling manifesteer.
Die Tribunaal het beslis dat Sandton Repo Cars artikel 51(1)(b) van die CPA oortree het deur bepalings in te sluit wat indirek afstand doen van die verbruiker se regte, 55(2)(a) tot (c) oortree het deur ‘n gebrekkige voertuig te verskaf en 56( 2)(b) deur versuim om die verbruiker terug te betaal.
Daarom het die Tribunaal Sandton Repo Cars beveel om ‘n bedrag van R459 900 aan die verbruiker terug te betaal en ‘n administratiewe boete van R100 000 opgelê.
Waarnemende kommissaris van die NCC, Hardin Ratshisusu, het kommer uitgespreek oor verskeie motorhandelaars wat steeds die bepalings van die CPA verontagsaam.
“Handelaars van tweedehandse voertuie moet voertuie verskaf wat veilig, defekvry en duursaam is en moet voertuie herstel, vervang of terugbetaal wat nie aan hierdie standaarde voldoen nie.
“Versuim om hierdie beginsels na te kom, benadeel nie net verbruikers nie, maar ondermyn ook die kerndoelwitte van die CPA. Die uitspraak en redes van die Tribunaal in hierdie twee sake bevestig dat die regte van verbruikers gerespekteer moet word.
Onthou dat jy nie net die motor kan teruggee en jou geld terugkry weens ‘n klein defek aan die motor soos ‘n gebreekte vensterskakelaar nie. Terwyl jy nie die venster kan oopmaak nie, kan jy steeds die motor bestuur en dit is waarvoor jy dit gekoop het. Die handelaar moet egter steeds die venster op sy koste herstel.
