Die departement van water en sanitasie sê Transvaalse munisipaliteite moet waterrekeningstelsels en inkomste-invordering verbeter, asook meer befondsing vir instandhouding toewys.
Dit aangesien die departement die tweede fase van die Lesotho Hoogland-waterprojek beplan om meer water by die Geïntegreerde Vaalrivierstelsel te voeg wat Transvaal van water voorsien.
Die projek moet teen 2028 voltooi wees.
Woordvoerder van die departement van water en sanitasie, Wisani Mavasa, sê: “Terwyl ons wag vir die tweede fase van die Lesotho Hoogland-waterprojek, werk ons saam met rolspelers in Transvaal, die Wêreldbank 2030 Waterhulpbrongroep, georganiseerde sakeondernemings, leiers van die burgerlike samelewing, asook sektorkundiges om bewusmakingsveldtogte vir die provinsie in te stel om almal op te voed en bewus te maak om water spaarsamer te gebruik.”
“Rand Water en die geaffekteerde munisipaliteite sal voortgaan om met die publiek te kommunikeer oor vordering met die implementering van die instandhoudingsprogram en die voorsiening van alternatiewe watervoorrade gedurende hierdie instandhoudingsperiode,” voeg Mavasa by.
