Die lyk van Jacques Freitag, ‘n voormalige wêreldhoogspringkampioen, is met skietwonde naby die Zandfontein-begraafplaas ontdek.
Die lyk van die 42-jarige voormalige wêreldhoogspringkampioen Jacques Freitag is met skietwonde in ‘n veld naby die Zandfontein-begraafplaas in Pretoria-Wes ontdek.
Freitag is twee weke gelede as vermis aangemeld. Hy is glo laas gesien toe hy omstreeks 01:00 op 17 Junie omstreeks 01:00 saam met ‘n onbekende man uit sy ma se huis vertrek het om na ‘n gastehuis in Pretoria-Wes te gaan.
Plaaslike polisiewoordvoerder, luitenant-kolonel Mavela Masondo, sê ‘n saak van moord word ondersoek.
Masondo voeg by niemand is nog in hegtenis geneem nie.
“Die ontdekking is gemaak deur die SAPD se soek-en-reddingspan wat ‘n soektog na die vermiste persoon gedoen het. Die span het lede van Air Wing met ’n polisiehelikopter, Water Wing en die plaaslike polisie ingesluit.”
Hy sê die familie van die oorledene het nog nie die liggaam uitgeken nie.
Freitag het die Wêreld Jeugkampioenskappe in Pole in 1999, Wêreld Junior Kampioenskappe in Chili in 2000 en die Wêreldkampioenskappe in Frankryk in 2003 gewen, voordat hy aan die 2004 Olimpiese Spele in Athene deelgeneem het.
Hy was een van slegs 10 atlete wat die wêreldkampioenskappe op die jeug-, junior- en seniorvlak gewen het.
Pleit vir hulp
Pretoria Rekord het vroeër berig sy suster, Chrissie Lewis, het ‘n pleidooi op Facebook geplaas en gesê die gesin het Freitag laas gesien ‘n dag ná sy 42ste verjaardag.
Lewis, wat van Bronkhorstspruit is, het aan die koerant gesê die familie het geen nuwe inligting oor waar hy hom bevind nie.
Sy het gesê sy het ‘n saak by die Lyttelton-polisiestasie geopen, wat aan haar gesê is na Pretoria-Wes SAPD oorgeplaas is.
