’n 37-jarige buitelander is Donderdagaand by die Beitbrug-grenspos in Limpopo in hegtenis geneem nadat ’n vragmotor wat hy bestuur het met springstof gelaai was.
Polisiewoordvoerder, brigadier Hlulani Mashaba, het gesê die polisie het twee houser springstof gevind terwyl hulle roetine-inspeksies by die grenspos se Suidhek gedoen het.
Hy het bygevoeg die wit vragmotor het Gautengse registrasieplate gehad, met ondersoeke wat aan die lig gebring het dat dit na dié provinsie op pad was.
“Die verdagte is onmiddellik in hegtenis geneem en daar is beslag gelê op die voertuig,” het Mashaba gesê.
Die verdagte sal na verwagting binnekort in die Musina-landdroshof verskyn en sal teregstaan op aanklag van die onwettige besit van springstof.
Mashaba het gesê die springstof se waarde is op sowat R300 000 gewaardeer. Polisie-ondersoeke na die voorval duur voort, het hy bygevoeg.
Thembi Hadebe, polisiekommissaris van Limpopo, het gesê die arrestasie kom nadat amptenare veiligheidsmaatreëls by Suid-Afrika se grensposte versterk het.
“Die onderskepping van hierdie springstof is ‘n belangrike prestasie in ons voortdurende pogings om misdaad te bekamp en ons gemeenskappe te beskerm,” het hy gesê.
