Die Valke ondersoek die saak verder.
Die portefeuljekomitee oor binnelandse sake is ingelig dat twee amptenare van die departement van binnelandse sake ondersoek word vir hul beweerde betrokkenheid by bedrog wat deur Chidimma Adetshina se ma gepleeg is.
Op 7 Augustus het die departement aangekondig dat, na ‘n ondersoek na sy argiefrekords en hospitaalbesoeke, daar prima facie redes was om te glo dat bedrog en identiteitsdiefstal moontlik gepleeg is deur die persoon wat in Binnelandse Sake se rekords aangeteken is as Adetshina se ma.
“’n Onskuldige Suid-Afrikaanse ma wie se identiteit moontlik gesteel is as deel van die beweerde bedrog wat deur Adetshina se ma gepleeg is, het as gevolg daarvan gely omdat sy nie haar kind kon registreer nie,” het die departement destyds gesê.
“Die departement het sy ondersoek uitgebrei om enige amptenare betrokke by die beweerde bedrieglike skema te identifiseer en vervolg, en is besig om regsadvies in te win oor die implikasies van die beweerde bedrieglike aktiwiteite op Adetshina se burgerskapstatus.”
Die hoof van die teenkorrupsie-eenheid, advokaat Constance Moitse, het Dinsdag die komitee ingelig dat hulle die ma en kind geïdentifiseer het wat gely het weens die beweerde identiteitsdiefstal.
Die ma, gebore in 1982, het in 1995 in Tshwane om haar ID-dokument aansoek gedoen. Toe sy haar ID in Pretoria gaan haal het, het amptenare haar meegedeel dat dit in Johannesburg afgehaal gaan word, waar sy nie daarvoor aansoek gedoen het nie.
Sy het later geboorte geskenk aan ‘n kind in 2001. Toe sy probeer het om haar kind se geboorte te registreer, is sy ingelig dat ‘n kind reeds onder haar ID-nommer geregistreer is. Daardie kind was Adetshina.
Die ma het maande lank probeer om ‘n geboortesertifikaat vir haar kind te bekom. Die departement het uiteindelik aan haar ‘n nuwe ID-nommer uitgereik, wat haar in staat gestel het om uiteindelik haar kind te registreer.
Die departement van binnelandse sake het gesê hy het die ma wie se ID gesteel is in Pretoria besoek. Die besonderhede in haar aanvanklike ID stem ooreen met dié in die departement se rekords vir Adetshina se ma.
Die departement het drie amptenare geïdentifiseer wat na bewering betrokke was by die registrasie van Adetshina se geboorte. Een van die amptenare is intussen oorlede, terwyl die ander twee ondersoek word.
Die departement het ‘n brief van die Wet op die Bevordering van Administratiewe Geregtigheid aan Adetshina se ma uitgereik.
“Haar reaksie op hierdie brief sal die finale besluit bepaal wat die departement sal neem met betrekking tot die ID wat sy tans dra.”
Die Valke ondersoek die saak.
Volgens die departement, soos sake staan, is Adetshina Suid-Afrikaans, volgens haar ma se beweerde bedrieglike ID.
“Noudat haar ma se status ter sprake is, in die geval dat die DG daardie ID-dokument finaal kanselleer, sal dit beteken dat die registrasie van Adetshina se geboorte self bedrieglik was, daarom kan daardie status nie ingevolge die wet bly nie,” het die departement gesê.
“Sy sal kwalifiseer om aansoek te doen vir ‘n ID, met die veronderstelling dat sy in die land gebore is.”
Die departement ondersoek ook Adetshina se pa, “omdat dit duidelik is dat die pa ook betrokke was by die registrasie van die geboorte”.
