Die nuwe residensiële eiendomsontwikkelings in die SSK neem die totale aantal wooneenhede op 7 188.
In ’n gedempte ekonomiese omgewing met gedempte beleggings in metro’s se middestede, keer Kaapstad se sentrale sakekern die neiging met meer as R7 miljard se eiendomsbeleggings in 2023 om.
Dit is volgens die jongste bevindinge deur die Kaapstadse Sentrale Stadsverbeteringsdistrik (CCID) – ‘n nie-winsgewende privaat-openbare maatskappy wat in die tradisionele sentrale sakekern (SBD) van die Moederstad bedrywig is.
Die bevindinge in die CCID se State of Cape Town Central City-verslag 2023 toon dat eiendomsbeleggings vanaf 2022 verdubbel het – ‘n teken dat die stad herstel het van die ekonomiese druk sedert die pandemie.
Altesaam 30 eiendomsontwikkelings of herontwikkelings is in 2023 aangeteken, waarvan nege voltooi is (ter waarde van meer as R1,3 miljard), agt was in aanbou (ter waarde van meer as R2,2 miljard), 10 was in die beplanningsfase (ter waarde van meer as R2,6 miljard), en drie is voorgestel (sowat R1,1 miljard).
Die R7,3 miljard se beleggings sluit in die Rubik, ‘n wolkekrabber vir gemengde gebruik ter waarde van R600 miljoen en ontwerp om soos die Rubik’s Cube te lyk, die Neighbourgood 84 Harrington (R180 miljoen) en die wêreld se hoogste aparthotel wat uit hennepbeetblokke gebou sal word, en The Barracks, ‘n R150 miljoen erfenisontwikkeling in Breëstraat.
In 2023 was 12 eiendomsontwikkelings (40%) residensiële geboue, en die res was geboue vir gemengde gebruik vir kommersiële en residensiële doeleindes.
Die algehele eiendomswaarde in Kaapstad se sentrale stad word op R42,8 miljard geraam (volgens die Stad Kaapstad se 2022-eiendomsevaluering) – op vanaf R12,2 miljard in 2016/17.
Rob Kane, voorsitter van die CCID, sê die beleggingsbedrag van R7,3 miljard in 2023 is buitengewoon, aangesien die gebied wat die CCID verplig is om te bestuur, slegs 1,6 km² groot is. Dit wys die Kaapstadse middestad het die “post-Covid-hoek” omgedraai.
“Dit is duidelik dat Kaapstad, anders as sy Suid-Afrikaanse eweknieë, ná die pandemie herstel het. Dit voorspel goed vir die toekoms van Kaapstad en sy SSK,” merk hy op.
Die nuwe residensiële eiendomsontwikkelings in die SSK neem die totale aantal wooneenhede op 7 188, met ‘n gemiddelde verkoopprys van deeltiteleiendomme op sowat R1,58 miljoen – ‘n 7,2%-verhoging vanaf 2022.
’n Opname onder inwoners van die sentrale stad toon dat 47% van deelnemers die SSK kies om naby die werk te wees, terwyl 39% sê hulle kies die area vir sy kosmopolitiese leefstyl. Dertig persent van deelnemers sê hulle beskou die SSK as ‘n veilige omgewing met goeie vermaak en kulturele opsies.
Ander noemenswaardige syfers uit die opname is:
41% van die respondente sê hulle kom van elders in die land;
82% van die respondente het aangedui dat hulle gelukkig is om in die SSK te woon;
62% sê hulle eet ten minste twee keer per week uit;
51% beskryf hulself as digitale nomades wat van enige plek in die wêreld kan werk; en
28% dui aan hulle woon al meer as 10 jaar in die sentrale stad.
Altesaam 2 767 van die SSK se wooneenhede is in die sogenaamde Precinct One, ook bekend as die Foreshore, geleë. Die nuwe One Thibault, voorheen ‘n kantoorblok wat deur Standard Bank-werknemers bewoon is, is onlangs voltooi. Dit is ‘n gebou vir gemengde gebruik ter waarde van R500 miljoen en voeg ‘n ekstra 428 wooneenhede by die area.
Nuwe residensiële ontwikkelings in die Foreshore wat tans gebou word, sluit in Zeeland Pier, ter waarde van R200 miljoen, in Heerengracht. ‘n Ontwikkeling vir gemengde gebruik word voorgestel vir Mechaustraat en ‘n residensiële woonstelblok in DF Malanstraat.
In Precinct Three, die tuiste van Company’s Garden, die parlement en die regskamers, is die R1,15 miljard The Fynbos luukse woonstelontwikkeling tans in aanbou, wat bestaan uit 689 eenhede oor 24 verdiepings. In 2023 is 235 eenhede tydens die ontwikkelingsfase verkoop.
In 2023 het 62 nuwe winkels hul deure geopen. Kleinhandelvertroue in die sentrale stad het geleidelik geklim met 93% van die kleinhandelaars wat ondervra is wat sê hulle is tevrede met die huidige saketoestande.
Die totale leegstaankoers van kleinhandelspasie in die SSK was 6% – ‘n toename vanaf die 4,9% wat in 2022 aangeteken is. Volgens Kane kan die hoër leegstaankoers deels verklaar word deur ‘n daling in die beskikbare kleinhandelspasie met die nuwe ontwikkeling van R200 miljoen op nabygeleë Strandstraat tans in aanbou.
Nuwe kleinhandelwinkels wat in 2023 geopen het, sluit in 15 kroeë en klubs, 11 gesondheids- en skoonheidswinkels, nege superette, agt klere- en skoenwinkels, vyf koffiewinkels en drie nuwe kunsgalerye.
Daar is huidiglik 1 305 besighede (2022: 1 243) in die sentrale stad bedrywig, insluitend 147 restaurante, 120 klere- en skoenwinkels, 100 wegneemetes, 91 koffiewinkels en kafees, en 78 kroeë en klubs.
Volgens die CCID se verslag was daar ook ‘n afname in kantoorleegstandsyfers in 2023 (10,2% aan die einde van 2023, vergeleke met 13,3% in 2022 en 16,1% in 2021). Die Kaapstadse middestad het steeds die grootste gedeelte (byna aan 40%) van die totale kantoorruimte in die stad.
Die Stad Kaapstad se burgemeesterskomitee het die vrystelling van grond vir ‘n gemengde-gebruikontwikkeling in Rondebosch-Oos in die suidelike voorstede van Kaapstad goedgekeur. Daar sal nou ‘n openbare deelnameproses wees vir die beoogde verkoop van sewe hektaar grond in stadsbesit op die hoek van Kromboomweg en Sewende Laan.
Die stad het in ‘n verklaring aangekondig dat die grond ‘n potensiële opbrengs van 800 wooneenhede in ‘n ontwikkeling vir gemengde gebruik het, insluitend bekostigbare behuising, oopmarkbehuising, openbare oopruimtes en kleinhandelgeleenthede.
Bespreking met die nasionale regering duur voort vir die vrystelling van “goedgeleë mega-eiendomme” in Kaapstad. Hierdie eiendomme kan ongeveer 100 000 bekostigbare behuisingseenhede oplewer. Hulle sluit verskeie militêre basisse en gedeeltes van die Parlementêre Dorp in, sê die stad.
In dié verband sal Kaapstad se burgemeester, Geordin Hill-Lewis, en minister van openbare werke en infrastruktuur, Dean Macpherson, Donderdag (15 Augustus) terreinbesoeke doen.
